Qurbon hayiti arafasida xayrli ishga qo‘l urildi
Olloh taolo muayyan kun va muborak sanalarda O‘ziga ibodat qilishni, O‘zini zikr etib ulug‘lashni boshqa kunlardagidan ko‘ra afzal va ajrini ulug‘ qilib qo‘ygan. Bunday kunlarda bajariladigan solih amallarning ajr va savobi ham bisyordir.
Respublika Maʼnaviyat va maʼrifat markazi viloyat bo‘limi rahbari Marhabo Pardayeva hamda O‘zbekiston Yozuvchilar uyushmasi viloyat bo‘limi rahbari Shodmon Sulaymonov hamrohligidagi maʼnaviyat targ‘ibotchilari hamda “Milliy gvardiya” viloyat boshqarmasi vakillarining Buxoro shahridagi Mattiyevlar oilaviy bolalar uyi tarbiyalanuvchilari bilan kechgan diydorlashuvi asnosida barchaning ko‘nglidan ana shunday tuyg‘ular kechdi.
Buxoro shahridagi sobiq 32-sonli “Mehribonlik uyi”ning so‘nggi 7 nafar tarbiyalanuvchisini o‘z qaramog‘iga olgan bu oila xayrli ishga bosh qo‘shganidan, uch nafar farzandi safiga yana 7 nafar pahlavon o‘g‘il qo‘shilganidan xursand va bugun dilida shukronasi bisyor. Binobarin, ota-ona mehridan bahramand bo‘layotgan o‘g‘lonlarning har biri o‘z oldiga katta maqsadlar qo‘ygan: biri sportchi, biri tarixchi olim, biri muhandis, boshqa biri “Zakovat” bilimdoni va guruh sardori bo‘lish niyatida.
Jamoatchilik vakillarining ular uchun sevimli qadriyatga aylangan kitoblar, o‘quv qurollari bilan yo‘qlab borishgani qalbi orzularga limmo-lim o‘smirlarning o‘ziga bo‘lgan ishonchini oshirgani shubhasiz. Ayniqsa, ustozlarning ular ishtirokida “Zakovat”chi bilimdonlar jamoasini tuzish to‘g‘risidagi taklifi ularga olam-olam quvonch bag‘ishladi.
Shu kuni faollar Buxoro shahri, Amir Temur ko‘chasida istiqomat qilayotgan, besh nafar qizaloqni o‘z bag‘riga olgan Behbudovlar xonadonida ham bo‘ldilar. Yozgi taʼtil gashtini surish bilan birga, turli hunarlarni o‘rganishga kirishgan qizlar bilan suhbat asnosida ularning orzu va rejalari ulkan ekanligi ayonlashdi. Ayniqsa, ularning kitob mutolaasi va sheʼr mashqini xush ko‘rishlari, o‘qigan asarlari to‘g‘risida hayajonga to‘lib so‘zlashlari, o‘zlari yod olgan ijod namunalaridan o‘qishlari barchada iliq taassurot qoldirdi.
