Қурбон ҳайити арафасида хайрли ишга қўл урилди
Оллоҳ таоло муайян кун ва муборак саналарда Ўзига ибодат қилишни, Ўзини зикр этиб улуғлашни бошқа кунлардагидан кўра афзал ва ажрини улуғ қилиб қўйган. Бундай кунларда бажариладиган солиҳ амалларнинг ажр ва савоби ҳам бисёрдир.
Республика Маънавият ва маърифат маркази вилоят бўлими раҳбари Марҳабо Пардаева ҳамда Ўзбекистон Ёзувчилар уюшмаси вилоят бўлими раҳбари Шодмон Сулаймонов ҳамроҳлигидаги маънавият тарғиботчилари ҳамда “Миллий гвардия” вилоят бошқармаси вакилларининг Бухоро шаҳридаги Маттиевлар оилавий болалар уйи тарбияланувчилари билан кечган дийдорлашуви асносида барчанинг кўнглидан ана шундай туйғулар кечди.
Бухоро шаҳридаги собиқ 32-сонли “Меҳрибонлик уйи”нинг сўнгги 7 нафар тарбияланувчисини ўз қарамоғига олган бу оила хайрли ишга бош қўшганидан, уч нафар фарзанди сафига яна 7 нафар паҳлавон ўғил қўшилганидан хурсанд ва бугун дилида шукронаси бисёр. Бинобарин, ота-она меҳридан баҳраманд бўлаётган ўғлонларнинг ҳар бири ўз олдига катта мақсадлар қўйган: бири спортчи, бири тарихчи олим, бири муҳандис, бошқа бири “Заковат” билимдони ва гуруҳ сардори бўлиш ниятида.
Жамоатчилик вакилларининг улар учун севимли қадриятга айланган китоблар, ўқув қуроллари билан йўқлаб боришгани қалби орзуларга лиммо-лим ўсмирларнинг ўзига бўлган ишончини оширгани шубҳасиз. Айниқса, устозларнинг улар иштирокида “Заковат”чи билимдонлар жамоасини тузиш тўғрисидаги таклифи уларга олам-олам қувонч бағишлади.
Шу куни фаоллар Бухоро шаҳри, Амир Темур кўчасида истиқомат қилаётган, беш нафар қизалоқни ўз бағрига олган Беҳбудовлар хонадонида ҳам бўлдилар. Ёзги таътил гаштини суриш билан бирга, турли ҳунарларни ўрганишга киришган қизлар билан суҳбат асносида уларнинг орзу ва режалари улкан эканлиги аёнлашди. Айниқса, уларнинг китоб мутолааси ва шеър машқини хуш кўришлари, ўқиган асарлари тўғрисида ҳаяжонга тўлиб сўзлашлари, ўзлари ёд олган ижод намуналаридан ўқишлари барчада илиқ таассурот қолдирди.
Республика Маънавият ва маърифат маркази вилоят бўлими ахборот хизмати
