ИЖТИМОИЙ ТАРМОҚЛАРНИНГ БИРИДА ЖОЙЛАШТИРИЛГАН МАЪЛУМОТГА ИЗОҲ
Мазкур хабарда Миробод тумани, А. Фитрат кўчасида жойлашган 4 қаватли 33/2 уйнинг ертўласида Меҳрибонлик уйлари битирувчилари учун уй-жойлар ажратилаётганлиги айтилган.
Ушбу маълумот ҳақида биз қуйидагиларни хабар қиламиз.
Давлатимиз раҳбарининг 2021 йил 9 августдаги "Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида" ги Фармонига мувофиқ уй-жой билан таъминланмаган ўқув-тарбия муассасалари ўқувчиларига, етим болалар ва ота-она қарамоғидан маҳрум бўлган болалар учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари шаҳар ва туманларда қурилган кўп қаватли турар-жой биноларида бирламчи кўчмас мулк бозорида хонадонлар сотиб олинади.
Маълумотларга аниқлик киритиш учун Миллий гвардия Ахборот хизмати Миробод тумани ҳокимининг Архитектура, капитал қурилиш ва коммуникацияларни ривожлантириш бўйича ўринбосари Фарҳод Нажмиддинов билан боғланди. Телефон орқали бўлган суҳбатда Нажмиддинов қуйидагиларни маълум қилди:
- Биринчидан, бу ертўла эмас, балки деразалари деярли 2*2 метргача бўлган қуйи қават. Иккинчидан, мазкур манзилдаги уйлар ҳақиқатан ҳам турар-жой биноларига айлантирилмоқда. Аммо ушбу хонадонлар "Меҳрибонлик" уйлари битирувчилари учун мўлжалланмаган, чунки янги турар-жой биноларидан Меҳрибонлик уйлари болалари учун хонадонлар ажратилиши юзасидан Президент Фармони мавжуд.
Комиссия қарорига асосан 33/2 кўп қаватли уйнинг янгиланган қуйи қаватидан кимга хонадон ажратилиши аниқланади.
Эслатиб ўтамиз, бу хонадонлар "Меҳрибонлик" уйларининг битирувчилари учун эмас.
