Миллий гвардия ходимлари икки нафар вояга етмаган фарзанди бор оилани Ватанига қайтишига ёрдам берди
Миллий гвардия Фарғона вилояти бўйича бошқармаси ходимларига жорий йилнинг август ойида Бувайда туманидан бўлган оила қўшни республикага ишлаш учун кетгани, бироқ эр-хотин иш топа олмасдан молиявий тарафдан жуда қийин аҳволда эканлиги, шунингдек, уларнинг ёнларида Фарғона вилояти Бувайда туманидаги 23-сон умумий ўрта таълим мактабининг 4 ва 7-синфининг ўқувчилари бўлган икки нафар фарзандлари борлиги ҳақида хабар келиб тушган. Шу билан бирга бу оила ўз ватанларига қайтишни иложи йўқлиги ва бу юзага келган муаммолар туфайли ўғилларининг мактабга бориб, таълим олишга имкони йўқлиги бўйича маълумот олинган.
Шундан сўнг, Миллий гвардия Фарғона вилояти бўйича бошқармаси бошлиғининг ўринбосари – Болалар билан ишлаш бошқармаси бошлиғи подполковник Қ.Тошдонов Бувайда туманига бориб, ушбу оиланинг яқинлари билан учрашди, шароитлар билан танишиб, интернет орқали оила бошлиғи билан боғланди ва барча тафсилотлар тўғрисида маълумот олди. Асосийси кейинги ҳаракатлар бўйича тавсиялар берилиб, бошқа манфаатдор идоралар билан биргаликда оилани ўз ватанига қайтариш чоралари кўрилди.
Бугунги кунда бу оила ўз уйида ва фарзандлар таълим олиш учун қадрдон мактабида билим олмоқда. Қолдирилган дарс соатларини қайта ўзлаштириш учун болаларга қўшимча билимлар бериш мақсадида индивидуал дарслар берилиши йўлга қўйилди.
