1-июнь - "Халқаро болаларни ҳимоя қилиш куни" муносабати билан байрам тадбири ташкил этилди
Халқаро болаларни ҳимоя қилиш куни бутун дунё болалари учун энг беғубор ва қувончли байрам ҳисобланади. Албатта, бола бу дунё, бу ҳаёт мазмунининг ажралмас қисмидир. 1-июнь - яъни, ёзнинг илк куни дунёнинг деярли барча мамлакатларида ва бизнинг юртимизда ҳам кенг миқёсда байрам сифатида нишонланади.
Ана шундай тадбирлардан бири Миллий гвардия Фарғона вилояти бўйича бошқармасида ҳам ҳарбий хизматчилар фарзандлари учун кўтаринки руҳда ўтказилди. Тадбирни бошқарма бошлиғи "Ўзбекистон-болажон юрт, халқимиз азал-азалдан болажон халқ эканлиги ва болалар бизнинг қувончимиз, ишончимиз" деган сўзлари билан бошлаб, ташриф буюрган меҳмонлар ҳамда болажонларни байрам билан самимий табриклади. Шундан сўнг, барча жажжи меҳмонларга болажонлар учун аталган совғалар улашилди.
Болажонларни кўзларида табассум уйғотиш ва кўтаринки кайфият улашиш мақсадида тадбирнинг бадиий қисмида Фарғона шаҳар Маданият марказидан ташриф буюрган болалар ва санъат вакиллари томонидан ажойиб байрам кечаси бўлиб ўтди. Куй-қўшиқ ва рақслар ижроси томоша қилинди. Байрам тадбири ўзгача шукуҳ ва кайфиятда ўтказилди, муҳими, қалбларида фақат мусаффолик уфуриб турган болаларимиз янада завққа тўлиб, маданий озуқа олди.
