14 нафар Оилавий болалар уйи фарзандларига “Порлоқ келажак” оромгоҳи учун йўлланмалар тақдим этилди
Бухоро вилоятида истиқомат қилувчи Оилавий болалар уйининг 14 нафар фарзандларига Миллий гвардия Бухоро вилояти бўйича бошқармаси ҳамда Ўзбекистон Касаба уюшмалари федерациясининг вилоят кенгаши томонидан Вобкент туманидаги "Порлоқ келажак" болалар соғломлаштириш оромгоҳида дам олиш учун йўлланмалар тақдим этилди.
Болажонлар тоза ҳавода ҳордиқ чиқариш билан бирга, от миниш, велосипед бошқариш ҳамда турфа гуллардан гулчамбарлар ясашни ўрганишди.
Шунингдек, турли фанлар бўйича тўгаракларда билим ва кўникмаларини мустаҳкамлашмоқда.
Эътироф этиш жоизки, оромгоҳда ёшлар ўзлари ёқтирган машғулотлари билан шуғулланиш имконига эга бўлиб, ажойиб заргарлик буюмларини ясаш, бадиий китоб ўқиш, расм чизиш, шеър ёзиш ёки қўшиқ куйлаш йўналишларида ҳам ўз имкониятларини синаб кўришмоқда.
Шу билан бир қаторда, оромгоҳда ёшлар учун турли маънавий-маданий тадбирлар, спорт мусобақалари ташкил этилиб, уларнинг мароқли дам олишлари таъминланмоқда.
