14-сонли Меҳрибонлик уйи тарбияланувчилари учун ёнғиннинг олдини олиш, спорт ва билим инсон учун қанчалик муҳим аҳамиятга эга эканлиги юзасидан тадбир ташкил этилди
Чирчиқ шаҳрида жойлашган 14-сонли “Меҳрибонлик уйида” Миллий гвардия Тошкент вилояти бўйича бошқармаси, Чирчиқ шаҳар Ҳарбий прокуратураси ва Фавқулодда вазиятлар Тошкент вилоят бошқармаси томонидан болажонлар учун турли кўргазмали ва спортга йўналтирилган тадбирлар ташкил этилди.
Даставвал, спортчилар билан учрашув бўлиб ўтди. Унда бир қатор спорт турлари бўйича жаҳон ва осиё чемпионлари болаларга қандай қилиб ғалабаларга эришганликларини, ҳаётий тажрибаларини сўзлаб бериб, мунтазам спорт билан шуғулланишнинг афзалликлари ҳақида гапиришди.
Шундан сўнг, ўт ўчирувчилар болаларга ёнғиннинг келиб чиқиш сабабларини, ёнғин билан боғлиқ бахтсиз ҳодисаларни олдини олиш ва ёнғин келиб чиққан вазиятларда биринчи навбатда нима қилиш кераклигини тушунтириб ўтишди. Шунингдек, тадбир давомида болаларга бирламчи ёнғинга қарши воситалардан қандай фойдаланиш кераклиги кўргазмали тарзда кўрсатилди.
Шундан сўнг, муҳим 5 ташаббус доирасидаги тўгаракларда тарбияланувчилар муддатли ҳарбий хизматчилар билан биргаликда стол тенниси, шахмат- шашка бўйича беллашдилар. Арқон тортиш мусобақаларида дўстона баҳс олиб боришди. Болалар каратэ спорти бўйича ҳам ўз истеъдодлари ва кўникмаларини тадбир иштирокчиларига намойиш этишди. Қизлар эса чеварчилик устахонасида устозларидан ўрганиб, ўзлари тиккан қўл меҳнати маҳсули иштирокчиларнинг эътиборини тортди.
Шу билан бир қаторда, мусиқа билан мунтазам равишда шуғулланиб келаётган болалар меҳмонларга миллий мусиқа асбобларини қандай чалиш кераклигини кўрсатиб бериб, бўш вақтларида цитрус мевалар етиштирадиган иссиқхонага таклиф этишди.
