15 май - "Халқаро оила куни" муносабати билан “Янги Ўзбекистоннинг ибратли оиласи” кўрик-танловининг вилоят босқичи ўтказилди
Бугунги ҳаловатли ва фарахбахш ҳаётимизнинг манбаи бўлган Мустақиллик шарофати билан инсоннинг бахту-саодатига хизмат қиладиган муқаддас қадриятлар қаторида оила деб аталмиш “кичик мамлакат” тақдири ҳам давлат сиёсати даражасига кўтарилган бўлиб, умуминсоний, миллий ва оилавий қадриятлар мустаҳкамланмоқда.
Жорий йилнинг 14 май санасида Бухоро давлат университетида 15 май - "Халқаро оила куни" муносабати билан “Янги Ўзбекистоннинг ибратли оиласи” кўрик-танловининг вилоят босқичи ўтказилди. “Фаровон оила” ғояси остида илк бор ташкил этилган мазкур танлов вилоятимиз аҳолиси томонидан катта қизиқиш билан кутиб олинди.
Бир-биридан қизиқарли шартлар асосида беллашган, вилоятимизнинг барча ҳудудларидан ташриф буюрган иштирокчи оилалар ижобий фазилатлари, жамиятда тутган ўрни, оиланинг қадриятларга муносабати бўйича ўзаро тажриба алмашдилар.
Қувонарлиси шундаки, мазкур танловда иштирок этган, Бухоро вилояти Пешкў туманидан ғолиб деб топилиб, вилоят босқичига ташриф буюрган, 6 нафар меҳрга ташна болакайларни ўз қарамоғига олган 8-сонли "Оилавий болалар уйи", "Сатторовлар" оиласи танловнинг "Энг матонатли оила" номинацияси ғолиби деб топилиб, вилоят ҳокимининг фахрий ёрлиғи ҳамда қимматбаҳо совғасига эга бўлдилар.
Эътироф этиш жоиз, тадбирда Миллий гвардия Бухоро вилояти бўйича бошқармасининг оила аъзолари билан ташриф буюрган ҳарбий хизматчилари ҳам фаол иштирок этиб, ғолиб ва совриндорларни қўллаб-қувватлаб турдилар.
