Президент Шавкат Мирзиёев раислигида ўтказилган видеоселекторда меҳрибонлик уйларидаги болаларни оилага яқин муҳитда тарбиялаш, билим ва маънавиятли, ватанпарвар инсонлар этиб вояга етказишга алоҳида эътибор қаратилиб, бу борада янги тизим жорий қилиниши таъкидланганди.

Нурафшон шаҳрида илк маротаба Эзгу ишга қўл урган Нурафшон шаҳар Ойбек МФЙ, Ойбек 2-проезд кўчаси, 14-уйда истиқомат қилувчи Миразизова Дилноза Мурадовналар томонидан шаҳар ҳокимлиги билан хамкорликда 1-сонли “Нурафшон мехри” Оилавий болалар уйини очиб, Бўка туманидаги 15-сонли Мехрибонлик уйидан 5 нафар болаларни оила бағрига қабул қилиб олишди. Шунингдек, Марифат МФЙ, Хақиқат кўчаси, 58а уйда истиқомат қилувчи Халикова Дилфуза Анваровналар томонидан шаҳар ҳокимлиги билан хамкорликда 2-сонли “Ширин Мехрим” номли Оилавий болалар уйини ташкил қилиб Бўка туманидаги 15-сонли Мехрибонлик уйидан 5 нафар ўғил-қизларни ўз тарбиясига олишиб, Оилавий болалар уйи фаолиятини йўлга қўйишди.

Оилавий болалар уйларининг тантанали очилиш маросимида шаҳар ҳокими М.Салиев, Миллий гвардия Тошкент вилояти бўйича бошқармаси ҳодимлари, ва бошқа масъул идоралар ҳамда ташкилотлар мутасадди раҳбарлари иштирок этишди.

Тадбир давомида оилавий болалар уйи эгаларига шаҳар ҳокими ўз миннатдорчилигини билдирди. Шаҳар "Баркамол авлод" болалар мактаби ходимлари томонидан тайёрланган театрлаштирилган саҳна кўринишлари ва қорбобонинг Янги йил совғалари болажонлар кайфиятини кўтариб юзларига табасум улашишга сабаб бўлди.

Хонадонларда уларнинг эмин-эркин яшашлари, оилавий муҳит тафтини ҳис қилиб улғайишлари учун барча шарт-шароит муҳайё этилган. Муҳими, бу болалар энди ота-она меҳру муҳаббатидан баҳраманд бўлишади, ўзларини тенгқурларидан асло кам сезишмайди.