24 нафар ўғил-қизларга имтиёз асосида олий таълимга ўқишга қабул қилинганликлари бўйича талабалик гувоҳномалари топширилди
Давлатимиз раҳбарининг 2021 йил 9 августдаги қарори асосида олий таълим муассасаларига талабаларни қабул қилишнинг умумий сонидан Меҳрибонлик муассасалари битирувчилари учун қўшимча равишда бир фоизгача давлат гранти асосида қабул квоталари SOS – болалар маҳаллалари, Оилавий болалар уйлари фарзандлари, шунингдек, васийликка, ҳомийликка олинган болалар учун ҳам тадбиқ қилина бошлади.
Маълумот учун: ушбу қўшимча квоталарнинг олий таълим муассасалари бўйича тақсимоти Халқ таълими вазирлиги ва Миллий гвардия томонидан белгиланиб, 2021/2022 ўқув йилида жами 267 нафар,2022/2023 йилда бўлса, жами 790 нафар етим ва ота-она қарамоғидан маҳрум бўлган болалар ўқишга қабул қилинди. Шундан 24 нафари (улардан 16 нафари васийликдаги, 5 нафари Меҳрибонлик уйининг битирувчилари ва 3 нафари Оилавий болалар уйларининг фарзандлари) Жиззах вилояти ёшларини ташкил этади.
Куни кеча Миллий гвардия Жиззах вилояти бўйича "Қўриқлаш" бошқармасида ёшларга олий таълим муассасаларига ўқишга қабул қилинганликлари бўйича талабалик гувоҳномасини тантанали топшириш маросими бўлиб ўтди.
Унда Ўзбекистон Республикаси Миллий гвардияси қўмондони ўринбосари, полковник С.Мамаюсупов, Жиззах Давлат педагогика университети ўқув ишлари проректори Ботир Тўхтамишов, Жиззах вилояти ҳокимлиги Болаларни ҳимоя қилиш котибияти мудири Наргиза Мавлонова, вилоят Халқ таълими Болаларни ижтимоий ҳимоялаш ва қўллаб-қувватлаш бошқармаси бош мутахассиси Элбек Усмонов, Оила ва хотин қизлар бошқармаси бошлиғи ўринбосари Гулнора Икромова ва Миллий гвардия Жиззах вилояти бўйича бошқармаси ҳарбий хизматчилари ҳамда ёшлар иштирок этди. Тадбирда сўз олганлар, бугунги мураккаб глобаллашув даврда жамиятимизда миллий ғоя ва мафкуравий иммунитетни кучайтириш, ёшларимизни турли зарарли ғоя ва таҳдидлардан асраш, уларни ўз мустақил фикрига эга, иродали, фидойи ва ватанпарвар инсонлар этиб тарбиялаш ҳар қачонгидан ҳам долзарб аҳамият касб этаётганлигини таъкидлаб, ёшларга кўпроқ тил ўрганиш ҳамда ахборот технологиялари соҳасида янгиликлардан хабардор бўлиш кераклигини тавсия этди.
Шундан сўнг, уларга тантанали равишда талабалик гувоҳномалари, Миллий гвардия қўмондонлиги ташаккурномаси ҳамда бадиий китоблар топширилди.
