Ҳарбий қисмда бир кун
Миллий гвардия Фарғона вилояти бўйича бошқармасида вилоят ҳарбий прокуратураси, Қўриқлаш бошқармаси билан ҳамкорликда, вилоятдаги оилавий болалар уйи фарзандлари ҳамда ҳарбий хизматчилар фарзандларини қишки таътил кунларини янада мароқли ўтказиш мақсадида, “Ҳарбий қисмда бир кун” шиори остидаги очиқ эшиклар куни ташкил этилди.
Тадбир давомида ёшларга ватанпарварлик, миллий армиямизга жисмонан бақувват ва маънан етук ёшлар зарурлиги, ҳарбий хизмат ҳар бир Ўзбекистон фуқароси учун муқаддас бурч экани ҳақидаги тушунчалар берилди.
Ўз фаолиятларини ҳарбий либос кийиш билан бошлаган тадбир иштирокчилари ҳарбий хизматчиларнинг ҳарбий ҳаёти, жанговар ва тактик машғулотларини кузатиш, ақлий ва жисмоний салоҳият касб этадиган ҳарбийлик касбининг нақадар шарафли эканлигини ўз кўзлари билан кўриб, ўзларида ҳам ватанпарварлик туйғулари мужассам эканлигини яшириб ўтиришмади.
Кун тартибига мувофиқ ёшлар, бошқармада ташкил этилган кутубхона ҳамда музей фаолияти, психологик хизмат кўрсатиш сифатини, ҳарбий қисмда ҳарбий хизматчилар учун яратилган шарт-шароитлар билан танишиб чиқишди, шунингдек, ёшлар учун ҳарбий қисмда тушлик ташкил этилиб, ҳарбийча дастурхон безатилди.
Куннинг иккинчи ярмида эса, махсус хизмат итлари чиқишларини томоша қилиш билан бир қаторда, бугунги кунда тобора оммалашаётган спорт тури бўлган камондан отиш спорт тури бўйича ҳам машғулотлар ташкил этилиб, ёшлар ўз маҳоратларини синовдан ўтказдилар.
Бундай маънавий-маърифий ва спорт-соғломлаштириш кунларини мунтазам ўтказиш ёшларимизни ватанпарвалик руҳида тарбиялашга замин яратиши, шубҳасиз.
