Боғдод туманида Меҳрибонлик уйининг яна бир собиқ битирувчиси оз хонадонига эга болди.
Оятулло Ҳакимов Мақсужон Мирзаев сингари Қўқон шаҳридаги 12-сонли Меҳрибонлик уйи тарбияланувчиси. У 2014 йили 16 ёшга тўлди ва 2016- йилдан буён уй-жой билан таминланишини кутди, аммо кутиш анча узоққа чўзилди...
Оятулло Қўқон шаҳри " Давронбек" маҳалласида жойлашган пишириқ ишлаб чиқарувчи корхонанинг омборидаги хонада яшашга мажбур бўлган. Шу давр мобайнида у мазкур корхонада ишлаган. Айтиш керакки, шароит ва қулайликлар умуман санитария-гигиена талабларига жавоб бермасди.
Давлатимиз Раҳбарининг 2022 йил декабрь ойида Тошкент шаҳри Учтепа туманига ташрифи якуни бўйича ўтказилган йиғилишда Меҳрибонлик уйлари собиқ битирувчиларининг яшаш шароитларини зудлик билан ўрганиш ҳамда мавжуд муаммоларни бартараф этиш вазифаси қўйилганидан сўнг, вазият тубдан ўзгарди…
Қўқон шаҳар ҳокимлиги, Миллий гвардия Фарғона вилояти бўйича бошқармаси вакиллари томонидан Боғдод тумани марказидаги «Мурувват» маҳалла фуқаролар йиғинида янги хонадон калитлари Оятуллога тантанали равишда топширилди.
У катта ҳаяжон билан кўрсатилаётган эътибор ва ғамхўрлик учун, шунингдек, орзуларининг рўёбга чиқишида кўмак берган Президентимиз ҳамда масъул раҳбарларга ўзининг чексиз миннатдорчилигини изҳор қилди.– Хонадон ёруғ, кенг, қулай, зарур мебель, маиший техника билан таъминланган. Маҳалладаги қўшнилар мени илиқ кутиб олиб, самимий табриклашди. Бир сўз билан айтганда, ҳаёт яхшиланмоқда.
