Билим ортиқча бўлмайди
Фарғона вилояти Фурқат туманида яшовчи Хуррият ва Равшанжон Комиловлар – ижодсевар ва янги билимлар ўрганиб, ўз ижодкорлик қирраларини кенгайтиришни яхши кўрувчи инсонлар. Ўзлари ташкил қилган оилавий болалар уйига қабул қилган ўн нафар ўғил ва қизларини янги билим олишга қизиқтиришни мақсад қилиб қўйишган. Шу сабабдан Комиловлар уйида ижодкорлик муҳити ҳукмронлик қилмоқда ва болалар ҳеч ҳам зерикишмайди.
Оилада кечки вақтларда китоб мутолаа қилиш, илмий, қизиқарли кўрсатув ва фильмлар томоша қилиш одатга айланган. Қизлар тикиш, бичиш, тўқиш билан шуғулланиб, ота-оналари ёрдамида мазали таомлар тайёрлашни ўрганишмоқда. Шунингдек, турли хил мусиқа асбобларини чалишади, болалар эса расм чизиш, шахмат ўйнашади, ва мунтазам жисмоний тарбия билан шуғулланишади. Ота-оналари болаларнинг истакларини рағбатлантириб турли хил тўгаракларга, рассомлик, хорижий тиллар студияси ва спорт секцияларига қатнашишини таъминлашади. Хуррият ва Равшанжоннинг айтишича, болалар нафақат янги нарсаларни ўрганишади, балки ота-оналарига устозларидан ўрганган нарсаларини ўргатишади. Ва энг муҳими, болалар ўз устида доимий ишлашга одатланишади.
