БОЛАЛАР УЧУН ЧАВАНДОЗЛИК ТЎГАРАКЛАРИ
Мамлакатимизда от спорти турларини янада ривожлантириш, янги авлод чавандозларини тайёрлаш ва тарбиялаш, ёшлар ўртасида от спортини фаол тарғиб қилиш ва оммалаштириш ишларига ҳар қачонгиданда алоҳида эътибор қаратилмоқда.
Президентимизнинг жорий йил 5 август кунидаги “Чавандозлар мактаблари фаолиятини ташкил этиш чора-тадбирлари тўғрисида”ги қарори билан Чавандозлар мактаблари Миллий гвардия тизимига киритилди. Ҳозирда ҳудудларда мазкур мактабларни ташкил этиш бўйича ишлар бошлаб юборилган.
Хусусан, Тошкент вилояти Юқори Чирчиқ туманида жойлашган Миллий гвардия Фахрий қоровул кавалерия эскадрони бўлинмаси от саройи базасида бугунда тумандаги ўқувчилар учун ҳафтанинг душанба, чоршанба, жума кунлари соат 9.00 дан 11.00 га қадар чавандозлик тўгараклари ташкил этилган.
Ушбу чавандозлар мактабида болалар от спортининг учкураш, тўсиқлардан сакраш, от йўрттириш, замонавий бешкураш, поло ҳамда улоқ-кўпкари турлари бўйича малакали мураббийлар машғулотларида иштирок этишмоқда.
От саройига яқин ҳудудда жойлашган Фаровон маҳалласидан чавандозлик мактабига 12 ёшдан 17 ёшгача бўлган 35 нафар ўқувчилари қамраб олинган. Тўгараклар қатнашчиларига даставвал мактабда от спортининг назарий жиҳатлари, махсус видео роликлар ва дарсликлар асосида ўргатилади. Профессионал, юқори натижаларни қўлга киритган от спорти чавандозлари ҳақида маълумотлар берилади. Ёшларнинг от спортига бўлган меҳрини янада ошириш ва отларнинг зотлари ҳақида маълумотлар бериш мақсадида улар парвариш қилинадиган отхоналарда тушунчалар берилади. От парвариши, тақа тақиш, ветеринария хизмати, отларни эгарлаш кабилар ўргатилади ва болалар мазкур жараёнларни мустақил равишда ҳам ўзлари амалга ошира олишади.
Ёшлар ёзги ва қишки манежларда от устида юриш ва бошқа машқларни бажаришади. Ҳатто қизларда ҳам ушбу спорт турига иштиёқи баланд эканлигини уларнинг от устида бемалол ҳаракатланишидан ҳам кўриш мумкин.
Албатта от спортининг барча спорт турлари сингари инсон саломатлиги учун фойдали эканлиги барчамизга маълум. Шу сабабли мазкур мактабларда машғулотлар олиб бораётган болалардан келгусида етук спортчилар етишиб чиқишига ишончимиз комил.
