Халқаро болаларни ҳимоя қилиш куни арафасида Миллий гвардия Сурхондарё вилояти бўйича бошқармаси ҳақиқий мўъжизалар масканига айланди Бу ерда болалар учун ўтказилган байрам тадбири ҳар бир иштирокчининг юрагида ёрқин хотира сифатида муҳрланди.
Тадбирда ҳарбий хизматчиларнинг фарзандлари, Оилавий уйларда тарбияланаётган болалар, ёш спортчилар ҳамда мураккаб тарбия талаб этувчи ўсмирлар иштирок этдилар. Уларнинг ҳар бири учун бу кун — ўз иқтидорини намоён этиш, дўстлар орттириш ва келажак ҳақидаги орзуларга яна бир қадам яқинлашиш куни бўлди.
Болалар ҳарбий машиналарга чиқиб қўришди, ҳарбий техника тузилиши билан танишишди, гвардиячилардан қаҳрамонлик ва мардлик ҳақида ҳикоялар тинглашди. "Қандай қилиб гвардиячи бўлиш мумкин?", "Қайси спорт турлари билан шуғулланиш керак?" — деган саволлар болаларнинг қизиқиш билан тўлиб-тошган кўзларида жавоб излаётганини кўрсатарди.
Гвардиячилар томонидан намойиш этилган кўргазмали чиқишлар эса барчани тўлқинлантириб юборди — олқишлар тўхтамади, болалар ўзларини келажакда шунақа мард ватанпарварлар деб тасаввур қилишди.
Ўсмирлар камондан отиш, от миниш бўйича маҳорат дарсларида ўз кучини синаб кўришди. Ақл-заковати бўлмиш шахмат-шашка ўйини ҳам қизғин кечди. Тадбирнинг энг жажжи иштирокчилари батутда сакраб, байрам кайфиятини янада баланд қилишди.
Тадбир якунида қўғирчоқ театри артистлари томонидан саҳналаштирилган мини-спектакль ва мусиқа, рақслар билан бойитилган концерт барчага бирдек манзур бўлди.
Бу байрам нафақат болалар учун, балки улар билан бирга қатнашган катталар учун ҳам эзгу хотира бўлиб қолди.
