“Меҳрибонлик" уйининг собиқ тарбияланувчиси уни ҳар томонлама қўллаб-қувватлагани учун миннатдорлик билдирди
Намоз Ёдгоров болалик чоғларини Бухоро вилоятида жойлашган 32-сонли Меҳрибонлик уйида ўтказган. Ушбу масканда у яхши таълим-тарбия олган ва доимо давлат томонидан қаратилаётган эътиборни ҳис қилиб яшаган. Бугунги кунда бўлса, у эл корига ярайдиган инсон бўлиш, мамлакат ривожига ҳисса қўшиш учун ҳаракат қилмоқда.
Намознинг орзуси ҳарбий бўлиш эди. Шу сабабли у Бухоро Юридик ва маиший хизмат коллежини тамомлагач, Миллий гвардия сафларида муддатли ҳарбий хизматни ўташ учун Тошкент шаҳрига отланди. Табиийки, ақлли, кўзлаган мақсадлари йўлида собитқадам йигит қўллаб-қувватланди. Муддатли ҳарбий хизматдан қайтгач эса Намоз “Қўриқлаш” бошқармасига уни ишга қабул қилишларини сўраб мурожаат қилди. Шундай қилиб, ҳозирги кунда Намоз “Қўриқлаш” бошқармаси сафларида хизмат олиб бормоқда. Қадрдонига айланишга улгурган Миллий гвардия эса йигит оила қуришга қарор қилган пайти тўй маросимини ўтказишга ҳам беғараз кўмаклашди.
Куни кеча ёш оилага яна бир кўмак кўрсатилди: Намозжон, “Меҳрибонлик” уйининг собиқ тарбияланувчиси сифатида хонадонга эга бўлди.
Янги хонадонда барча зарур жиҳозлар мавжуд, юмшоқ мебель, маиший техника, рўзғор учун идиш-товоқ, муҳтасар айтганда, Миллий гвардияга ҳудди ўғил фарзанддек бўлиб қолган Намозжонга оталарча ғамхўрлик кўрсатилди.
