Ота-она қарамоғидан маҳрум бўлган ва етим болаларни тарбиялашнинг тубдан янгиланган тизимини жорий этиш, уларнинг баркамол авлод сифатида шаклланиши ҳамда ижтимоий мослашувини таъминлаш учун зарур шарт-шароитлар яратиш, шунингдек, етим болалар ва ота-она қарамоғидан маҳрум бўлган болаларни давлат томонидан қўллаб-қувватлаш масалалари бугунги кунимиз олдида турган долзарб вазифалардан бири саналади.

Вазифалар ижросини таъминлаш, тарбияланувчиларни ота-онаси ёки уларнинг ўрнини босувчи шахсларга қайтариш, васий ёки ҳомий тайинлаш, фарзандликка бериш ва жойлаштиришнинг бошқа шаклларини қўллаш чораларини кўриш ва бу билан меҳрибонлик уйи тарбияланувчиларини касб - ҳунарга ўргатиш, уларда зарур ҳаётий кўникмаларни шакллантириш ҳамда ёшларни жисмонан соғлом, маънавий етук ва дунёқараши кенг қилиб тарбиялаш мақсадида Ўзбекистон Республикаси Жамоат хавфсизлик университети "Ҳарбий-ватанпарварлик, маънавий-маърифий тарбия ва ёшлар билан ижтимоий ишлаш" кафедраси профессор-ўқитувчилари ва Миллий гвардия Сурхондарё вилояти бўйича бошқармаси ҳамкорлигида Термиз шаҳридаги 12-сонли Меҳрибонлик уйи болаларини ўз қарамоғига олган ҳамда оилавий болалар уйлари ташкил этиш ниятида бўлган олийжаноб ота-оналарга зарур ҳаётий билимлар берилиб, навбатдаги сертификатлар топширилди.

Шунингдек, профессор-ўқитувчилар томонидан тарбияланувчиларнинг яшаш шароитлари, мактабдаги қизиқадиган фанлари, дўстлар билан ўзаро муносабати, касб танлаш каби мавзуларда суҳбатлашилди. Шу билан бирга, тарбияланувчиларнинг ижтимоий педагогик-психологик ҳолатини ўрганиш мақсадида, махсус сўровнома олинди. Мазкур сўровномада шунингдек, тарбияланувчилар ўзларини келажакда қандай инсон сифатида кўришлари, ўзлари каби вазиятга тушиб қолган болаларга қандай ғамхўрлик кўрсатиш мумкинлиги ҳақида фикрларга жавоблар олинди.