Чирчиқ шаҳри камондан отиш спорти бўйича Ўзбекистон чемпионатига мезбонлик қилмоқда
19 февраль куни Тошкент вилоятининг Чирчиқ шаҳрида жойлашган Ўзбекистон давлат жисмоний тарбия ва спорт университети базасида ёпиқ иншоотларда камондан отиш спорти бўйича барча ёш тоифалари ўртасида Ўзбекистон чемпионатига старт берилди.
Мусобақанинг тантанали очилиш маросимида Миллий гвардия, Камондан отиш федерацияси, вилоят спорт бошқармаси мутасаддилари ва вилоятдаги спорт мактабларининг камондан отиш спорти бўйича мураббийлари иштирок этдилар.
Тадбирда сўзга чиққанлар, бугунги кунда муҳтарам Президентимиз, Миллий олимпия қўмитаси раиси томонидан олимпия ва паралимпия ўйинларига киритилган спорт турларига қаратилаётган эътибор ҳамда ушбу йўналишда амалга оширилаётган чора-тадбирларга тўхталиб ўтди.
Шунингдек, 2021 йил 17 июнда Ўзбекистон Республикаси Президентининг "Камондан отиш спорт турини янада ривожлантириш ва оммалаштириш чора-тадбирлари тўғрисида"ги ПҚ-5149 сонли қарори қабул қилинганлиги, миллий қадриятларимизни ўзида мужассам этган қадимий Камондан отиш спорт турини мамлакатимизда ривожлантиришга ҳамда миллий терма жамоамиз сафларига маҳоратли спортчиларни саралаб олишга кенг хизмат қилаётганлиги алоҳида қайд этилди.
Халқаро ареналарда камончиларимизнинг зафарли юришлари, эришилаётган натижалари ҳамда ютуқлари айтиб ўтилди ва мусобақа иштирокчиларига омад тилаб, беллашувларга старт берилди.
Чемпионат 19-22 февраль кунлари ўтказилиши режалаштирилган бўлиб, дастлабки кунда Республикамизнинг барча ҳудудларидан келган 300 га яқин атлетлар, 4 та ёш тоифасида (катталар, ёшлар, ўсмирлар ва кичик ўсмирлар) ўтиш баҳсларида (квалификация) иштирок этдилар.
Қизғин кечаётган баҳслар давомида спортчилар ўз маҳоратларини синовдан ўтказиш билан бир қаторда, халқаро тоифадаги мураббийлар ва профессионал спортчилар билан тажриба алмашиш имкониятига ҳам эга бўлмоқдалар.
20 февраль куни атлетлар Олимпик раунд йўналишида баҳсларга киришишади.
Мазкур мусобақалардан сўнг айнан ушбу спорт мажмуасида 25-28 февраль кунлари пара камондан отиш бўйича Ўзбекистон чемпионати бўлиб ўтади.
Мусобақа тафсилотлари ва натижалари ҳақида расмий саҳифаларимиз орқали батафсил маълумотларни бериб борамиз.
