"Оилавий болалар уйи" тарбияланувчиларининг байдарка ва каноэ спорт мажмуасига саёҳати
Байдарка ва каноэда эшкак эшиш мусобақалари XIX асрнинг 60–йилларида Европанинг кўпгина мамлакатларида эшкакчилар клублари пайдо бўлгандан сўнг бошланган ва аввал байдаркаларда, кейин каноэда спорт пойгалари ўтказиладиган бўлган. Байдаркалардаги мусобақалар аёллар ва эркаклар ўртасида, каноэда эса—фақат эркаклар ўртасида ташкиллаштириб келинади. Байдаркалар бир кишилик, икки кишилик ва тўрт кишилик, каноэ—бир кишилик ва икки кишилик. 1972 йилдан байдарка ва каноэда слалом мусобақалари Олимпиада мусобақалари дастурига тажриба тариқасида киритилган ва катта қизиқишга, муросасиз беллашувларга сабаб бўлган.
Ўзбекистонда бу спорт тури ҳаваскорлари ўтган аср 50–йилларидан сув ҳавзалари, анҳор ва дарёларда машқ қилиб, мусобақаларда қатнаша бошладилар.
Ушбу спорт турига қаратилаётган эзгу саъй-ҳаракатларнинг рўёби сифатида 2021 йилнинг декабрь ойида, вилоят марказининг "Кўҳна ва боқий Бухоро" мажмуасининг шарқ томонида байдарка ва каноэ эшкак эшиш спорт мажмуаси қуриб, фойдаланишга топширилди.
Айни кунларда, аҳоли, ёшлар, меҳмонлар ва сайёҳларнинг севимли масканига, айниқса уларнинг бўш вақтларини унумли ва самарали ташкил этаётган мазкур муассаса спортсевар ёшларни тобора ўзига маҳлиё этмоқда.
Жорий йилнинг 19 апрел куни Миллий гвардия Бухоро вилояти бўйича бошқармаси масъуллари томонидан вилоятда ташкил этилган "Оилавий болалар уйи" тарбияланувчиларининг мазкур мажмуага саёҳати ташкил этилди. Тадбирга меҳмон сифатида ташриф буюрган Бухоро муҳандислик-технология институти талабалари эса тарбияланувчиларга ҳамроҳ бўлдилар.
Саёҳат давомида ёшлар, мазкур спорт турининг яратилиш тарихи, бугунги кунда умидли спортчиларимиз томонидан эришилаётган ютуқлар ҳамда ҳукуматимиз томонидан мазкур спортни оммалаштириш борасида амалга оширилаётган тизимли ишлардан хабардор бўлиш билан бирга, спортчиларнинг тренажёр залларида ҳам бўлиб, машғулотлар жараёни билан яқиндан танишдилар.
Тадбир давомида мазкур спортга қизиқувчан ёшлар томонидан берилган саволларга мутахассислар томонидан атрофлича жавоблар берилди.
