Ёш оилага бахт ва тотувлик тилаб қоламиз!
Инсон ҳаётида шундай кунлар борки, бу кунлар унинг тарих зарварақларидан юксак ўрин эгаллайди. Худди шундай инсонлардан бири 26 ёшли Озодбек Раимовнинг ҳам ҳаётида бахтли кунлар рўй берди. Собиқ Марғилон Меҳрибонлик уйи тарбияланувчиси Озодбек Миллий гвардия Фарғона вилояти бўйича бошқармаси вакиллари билан оила қуриб, янги ҳаёт қуриш режаси ҳақида бўлишганда, гвардиячилар ёш йигитга тўй тадбирини ташкиллаштиришда ёрдам беришларини айтишди.
Давлат таълим-тарбия муассасасида, ота-она меҳрисиз улғайган ёшлар атрофдагиларнинг эътибори ва қўллаб қувватлашини қадрлашади. Гвардиячилар билан биринчи танишув куниданоқ Озодбек ҳарбийларнинг самимийлигини ҳис қилди. Уларнинг танишувига эса узоқ вақт бўлмаган. Давлатимиз раҳбари топшириғига асосан ҳокимлик, Миллий гвардия ва бир қатор қизиқиш билдирган тизим ходимларидан ташкил топган ишчи гуруҳ 30 ёшгача бўлган ёшларнинг ҳаётини ўрганишга киришган. Ёшлар қандай муаммолар билан тўқнаш келишганини аниқлаб, қийин аҳволда қолган ёшларнинг муаммоларини ҳал этиш: жумладан, доимий иш, таълим, касби йўқ бўлган ёшларни оёққа туришига ёрдам беришни бошлашган. Озодбек Раимов эса Миллий гвардия вилоят бўйича бошқарма бошлиғи ўринбосарига бириктирилди.
Ҳамма бирдек кутган тўй Фарғона шаҳридаги “Мумтоз” тантаналар саройида бўлиб ўтди. Ёшларни табриклаш, уларга бахт тилаб совғалар беришга кўплаб меҳмонлар ва шу тариқа гвардия вакиллари ҳам ташриф буюришди.
Барчанинг тилакларига қўшилган ҳолда ёшларга бахт, ўзаро тотувлик тилаймиз!
