Ёшлар учун очиқ эшиклар куни тадбирлари ўтказилмоқда
Эртамиз эгалари бўлган ёш авлодни ватанпарварлик руҳида тарбиялаш, айниқса ҳарбий-ватанпарварлик руҳини уларнинг қалбида юксалтириш, маънавий баркамол, ақлан етук, жисмонан соғлом бўлиб вояга етишларини таъминлаш борасидаги ишлар доирасида, Ўзбекистон Республикаси Миллий гвардияси Тошкент минтақавий ўқув марказида ёшлар учун очиқ эшиклар куни тадбири ўтказилди.
Тадбир давомида ўғил-қизлар, марказда тингловчилар учун яратилган шароитлар, ёшлар учун йўлга қўйилган спорт тўгараклари, қурол-аслаҳа ҳамда махсус техникалар, хизмат отлари, мото- ва автопатрулнинг хизмат фаолияти, "Қўриқлаш" хизматининг тезкор ҳаракатланувчи гуруҳ ходимларининг вазифалари билан яқиндан танишдилар.
Бундан ташқари, бу каби тадбир Миллий гвардия Наманган вилояти "Қўриқлаш" бошқармасида Наманган давлат Педагогика институти талабалари учун ҳам ташкил этилди.
Ушбу тадбир ёшлар орасида ватанпарварлик ҳиссини мустаҳкамлаш, уларни қуролли кучларимизда олиб борилаётган ислоҳотлар билан яқиндан таништириш, шунингдек, ҳарбий хизмат соҳасига бўлган қизиқишларини оширишдан иборат. Тадбир давомида талабаларга Миллий гвардия ходимлари учун яратилган шарт-шароитлар, замонавий ҳарбий техника ва асбоб-ускуналар намойиш этилди.
Тадбир доирасида талабалар Миллий гвардия фаолияти, унинг кундалик вазифалари ва ходимларнинг масъулиятли ҳаёти билан яқиндан танишдилар. Ҳарбий-ватанпарварлик мавзусидаги махсус кўргазмалар, тренинглар ва интерактив суҳбатлар ёшлар ўртасида катта қизиқиш уйғотди. Шунингдек, уларга ҳарбий хизматга кириш тартиби, унга қўйилган талаблар ва имкониятлар ҳақида батафсил маълумот берилди.
