Жорий йилнинг 25 январь санасида 18 баҳорини қаршилаган Мадинахон Фарғона вилояти Учкўприк туманидаги 1- сонли Касб-ҳунар Мактабининг биринчи босқичида таҳсил олиб келмоқда. Тақдир тақозоси билан ота-онасидан етим қолган Мадинахон 2016 йилдан бери, васийликка олган опаси Марҳабо билан бирга яшаб келади.
Куни кеча Мадина Эркаевага Боғдод тумани марказида қад кўтарган кўп қаватли уйлардан замонавий таъмирланган ва барча шароитларга эга бўлган икки хонали хонадон калити тантанали равишда топширилди.
Фарғона вилояти Учкўприк тумани ҳокимлиги, Миллий гвардия Фарғона вилояти бўйича бошқармаси масъуллари ва кенг жамоатчилик иштирокида бўлиб ўтган тадбирда сўз олганлар ушбу хонадонда Мадинага фақат яхши кунлар ҳамроҳ бўлишига тилакдош бўлдилар.
Мадинанинг эртанги кундан кўнгли тўқ, касб-ҳунар мактабини битиргач муайян даромадли ишга эга бўлади, ота-онасидан ёдгор қолган яккаю-ягона опаси борлигидан хурсанд бўлган Мадинанинг энди ўз уйи ҳам бор.
Ҳудди шундай қувончли ва эсда қоларли кун, Фарғона шаҳрида истиқомат қилувчи Беҳрузбек Қорабоев ва Ўзбекистон туманида яшовчи Қаноатхон Холматоваларга ҳам насиб қилди.
Беҳрузбек ва Қаноатхон 2004 йилда Фарғона вилоятида туғилиб, ота-онасидан эрта ажралган ушбу ёшлар васийлик асосида таълим-тарбия олишди. Куни кеча ёшларнинг ҳаётида муҳим ҳодиса рўй берди ва уларга янги хонадон калитлари топширилди.
Шу муносабат билан ўтказилган тадбирда Миллий гвардия Фарғона вилояти бўйича бошқармаси бошлиғининг ўринбосари подполковник А. Мусинов, Фарғона шаҳар ҳокими ўринбосари Ю. Юсупов, Ўзбекстон тумани ҳокимлиги масъуллари ҳамда нуронийлар, маҳалла фаоллари иштирок этди.
Шу ўринда ёшлар ҳам юртбошимиз ҳамда халқимиз томонидан етим ва ота-она қарамоғидан маҳрум бўлган болаларга кўрсатилаётган эътибор ва ғамхўрлик учун ўз миннатдорчилигини изҳор этдилар.