Сўнгги йилларда етим ва ота-она қарамоғидан маҳрум бўлган болаларга эътибор оширилди, бу тоифадаги болаларни ижтимоий қўллаб-қувватлаш чора тадбирлари кучайтирилди.
Ота-онасидан ажралиб. етим қолган 3 нафар йигит ва 2 нафар қизларни бувиси, хола ва тоғалари тарбиялашган. Улардан бири Собиров Алишер Меҳрибонлик уйида катта бўлган. Балоғат ёшига тўлгач Алишер ва 19 ёшли Камила Юсуповага Фарғона вилояти маркази Фарғона шаҳридан хонадон ажратилган. Муҳтасархон Пайгамова эса таваллудининг 23 йиллигини Фурқат туманидаги янги хонадонда нишонлайди. У билан қўшни бўлиб Санатжон Тўйчиев ва 19 ёшли Ёдгоржон Мадаминов яшайди.
Юртимизда бу каби эзгу ишларни амалга оширишга, ота-она меҳрини кўрмаган ўсмир авлод ва ёшларга хар томонлама ёрдам кўрсатишга қаратилган бир қатор ҳужжатлар қабул қилинди. Хусусан, Вазирлар Маҳкамасининг 2021 йил 25 октябрда қабул қилинган № ПКМ-656 сонли “Етим болалар ва ота-она қарамоғидан маҳрум бўлган болаларнинг ижтимоий ҳимоясини кучайтириш, турар-жойлар билан таъминлаш, уларни оилавий болалар уйларига жойлаштириш, ҳаётга тайёрлаш учун қулай шарт-шароитлар яратиш тизимини такомиллаштириш тўғрисида"ги қарорига асосан ўтган йили Фарғона вилоятида 18 ёшга тўлган 17 нафар ёшлар уй-жой билан таъминланди. Бу йили эса 37 нафар йигит ва қиз янги хонадон эгаларига айланди. Хонадонлар шинам, таъмирланган ва тўлиқ жиҳозланган бўлишига алоҳида эътибор қаратилмоқда.
Юқорида айтиб ўтилгандек ёшларни уй-жой билан таъминлашдан ташқари, уларни ишга жойлашишида ҳам ёрдам кўрсатилмоқда.
Шунингдек, йигит ва қизлар давлат Раҳбарига ҳамда уларнинг уй-жой билан таъминланишида ўз ҳиссасини қўшган шахсларга самимий миннатдорчилик билдиришди.