Ҳарбий қисмда икки кун
Ўзбекистон Республикаси Қуролли Кучлари ташкил топганлигининг 30 йиллиги ва 14-январь Ватан ҳимоячилари куни муносабати билан юртимиз бўйлаб кўплаб ватанпарварлик тадбирлари ташкил этилмоқда.
Ёшларни Ватанга садоқат, муқаддас диёрга муҳаббат туйғулари ила камол топишига кўмаклашиш мақсадида 21-сонли Меҳрибонлик уйининг 30 нафар тарбияланувчилари Миллий гвардиянинг Тошкент шаҳридаги ҳарбий қисмларининг бирида 2 кунлик саёҳатини амалга оширишди. Ҳарбий ҳаётни ҳис этиш ва бу орқали ватанга муҳаббат туйғусини янада оширишни истаган бу ёшларнинг бугун орзулари ушалди.
Дастлаб, йигитлар ўзлари учун ҳарбий кийим-бошларни қабул қилишди. Улар ҳарбийларча либос кияр экан, ўзларини оз бўлсада ҳақиқий ватан ҳимоячисидек ҳис қилган бўлса ажаб эмас. Тадбир аввалида, ёшлар Миллий гвардия ҳарбий хизматчилари билан учрашиб, уларнинг кундалик машғулотлари, ҳаёт тарзи билан яқиндан таништирилди.
Шундан сўнг, тарбияланувчилар учун ҳарбий муҳандислик тайёргарлиги бўйича амалий ва назарий машғулотлар ташкил этилди ҳамда ёшлар махсус ҳимояловчи кийимни ҳам кийиб кўриш имкониятига эга бўлишди.
Шунингдек, тарбияланувчилар ҳарбий қисмнинг ширин таомларидан таътиб кўриш билан бирга кун давомида олган билимлари ва таассуротларини бир-бирлари билан ўртоқлашди. Ойнаи жаҳон орқали бўлса, юртимизда рўй бераётган сўнгги хабарлардан воқиф бўлишди.
Ташрифнинг иккинчи куни ёшлар кун тартибига риоя қилган ҳолда навбатчининг уйғон буйруғига асосан тезкорлик билан янги кунни қарши олиб, кундалик машғулотларга шай холга келишди. Ўқ отиш машғулотлари малакали ва кўп йиллик бой тажрибага эга бўлган офицерлар томонидан ўтказилди. Айниқса, тарбияланувчиларнинг хавфсизлик қоидаларига риоя қилган ҳолда ушбу машғулотни бевосита йўриқчилар назорати остида амалга ошириши ўсмирларда катта таассурот қолдирди десак муболаға бўлмайди.
Қолаверса ҳарбий хизматчилар томонидан намойиш этилган тоғ тайёргарлиги бўйича кўргазмали машқлардан сўнг, ўсмирларда бу машғулотни ҳам ўзларида синаб кўриш хоҳиши пайдо бўлди ва буни уддалашди. Жараёнда иштирокчиларнинг баъзилари тепаликдан пастга қараганда юзага келган ҳаяжонини енгиб ўтиб, машғулотларда тўлиқ қатнашди. Айниқса, қисқа фурсатларда болалар томонидан саф тайёргарлиги машқлари аъло даражада ўзлаштирилганлиги таҳсинга лойиқдир.
Тадбир сўнггида иштирокчилар учун қурол-аслаҳа ва ҳарбий техникалар кўргазмаси ташкил этилди ҳамда уддабурон, чаққон, эпчил тарбияланувчиларга дипломлар топширилди.
Ёшлар давлатимиз, армиямиз таянчидир. Мазкур икки кунлик ҳарбий қисмга бўлган саёҳат ҳам болажонларнинг дилида ҳарбий ватанпарварлик, мардлик ва садоқат туйғуларини янада оширишга хизмат қилганлигига ҳеч шубҳа йўқдир.
