“Хон атлас” фестивалида Оилавий болалар уйи қизларининг иштироки
Бугун Марғилон шаҳридаги Ҳунармандлар марказида вилоят ҳокимлиги ҳамда Миллий гвардия вилоят бўйича бошқармаси ташаббуси билан “Хон атлас” фестивали ўтказилди.
Фестивалдан кўзланган асосий мақсад миллий либосларимизда халқимизнинг асрларга туташ бўлган ўтмиши, урф-одати ва анъаналари, диди, эстетик қарашлари, ўзига хос хусусиятлари мужассамлигини намойиш этишдан иборат бўлди. Зотан, Хон атлас – энг ёрқин ранглар табиат жилоси, гуллар тасвирини ўзида мужассам этган ўзбек миллий матоси ҳисобланади. Мазкур матони қадимда фақат хонлар кийгани учун ҳам хон атлас номи билан аталган.
Мазкур фестивални Миллий гвардия марказий девони Хотин-қизлар жамоатчилик кенгаши аъзоси, полковник Дилором Худойберганова очиб берди.
Таъкидлаш жоизки, тадбирда вилоятдаги Оилавий болалар уйи қизлари ҳам меҳмон сифатида иштирок этишди.
Чинакам гўзаллик ва миллий колорит уйғунлашган кўргазмада дизайнерлар томонидан тикилган ва уларнинг ижод маҳсулларидан иборат бўлган турли хил кийимлар барчанинг эътиборини тортди.
Тадбир якунида ташкилотчиларга миннатдорлик рамзи сифатида ташаккурнома ҳамда эсдалик совғалари топширилди.
