Ипак ва зираворлар фестивали Оилавий болалар уйи фарзандларида улкан таассурот қолдирмоқда
Айни кунларда Бухоро шаҳрида анъанавий “Ипак ва зираворлар” фестивали бўлиб ўтмоқда.
Қадимий шаҳарнинг ўзига хос брендига айланган ушбу тадбир боис неча минг йиллик тарихга эга қадимий кўчалар, карвонсаройлар, савдо мажмуалари байрамона қиёфа касб этган. Шаҳар узоқ-яқиндан келган меҳмонлар билан янада гавжумлашди.
Турнақатор тизилган расталарда ҳунармандларнинг қўли-қўлига тегмаяпти. Ипак матоларнинг жилваси кўзларни қамаштирмоқда.
Мазкур тадбирда вилоятимиз ҳамда қўшни юртлардан келган меҳмонлар билан бирга, Миллий гвардия Бухоро вилояти бўйича бошқармаси ҳарбий хизматчи ва ходимларининг оила аъзолари, шунингдек, Оилавий болалар уйи фарзандлари ҳам фаол иштирок этмоқда.
Айтиш жоизки, фестиваль дастуридан доимгидек ранг-баранг тадбирлар жой олган.
Қадимий шаҳардаги устахоналарда зардўзлик, гиламдўзлик, каштачилик, кандакорлик, миниатюра санъати йўналишларида тажрибали халқ амалий санъати усталари томонидан маҳорат сабоқлари ўтказилмоқда.
Шунингдек, ипак ва миллий ҳунармандчилик маҳсулотлари ҳамда зираворлар кўргазма савдоси ҳам ташкил этилган.
Фольклор жамоаларининг чиқишлари фестивалга байрамона руҳ бағишламоқда.
