"КАМАЛАК" БОЛАЛАР ОРОМГОҲИДА СПОРТ МУСОБАҚАЛАРИ ЎТКАЗИЛДИ
Тошкент вилоятининг Бўстонлиқ туманида жойлашган ва жорий йилнинг май ойидан бошлаб Ўзбекистон Республикаси Миллий гвардиясига қарашли "Камалак" болалар соғломлаштириш оромгоҳида маънавий-маърифий ҳамда спорт тадбирлари бўлиб ўтди.
Мазкур тадбир Миллий гвардия Тошкент вилояти бўйича бошқармаси томонидан ташкил этилди.
"Камалак" болалар оромгоҳида 220 нафар қиз ва ўғил болалар 3 босқичда дам олиб, улар спорт мусобақаларига, "қизиқарли стартлар" эстафеталарига, интеллектуал ва ижодий танловларга мунтазам равишда жалб қилинмоқда. Болажонларнинг қизиқишлари турли хил: баъзилари расм чизишди, шеърлар ўқишди, бошқалари шахмат,сузиш ва қўл жанги мусобақаларида иштирок этди.
Ҳар бир инсон, айниқса, ёшлар камондан отиш мусобақаларида иштирок этишни яхши кўради. Мусобақа олдидан ҳарбий хизматчилар болаларга камондан отиш спорт турининг тарихи, ривожланиши ҳақида сўзлаб бериб, машғулотлар давомида фаол бўлган иштирокчилар амалий машқларда имкониятларини синаб кўришди.
Оромгоҳда фаолият кўрсатаётган тўгаракларда шуғулланаётган ёш авлод ўз маҳоратини намойиш этишди. Йигитларнинг самолётларни моделлаштириш дарсида ўз қўллари билан тайёрлаган самолётлари, уларнинг севимли мултфильмлари асосида ёғоч, лойдан ясалган ҳунармандчилик буюмлари барчанинг эътирофига сазовор бўлди.
Қизлар ҳам йигитлардан қолишмаган ҳолда яқинлари ва дўстлари учун қўл меҳнати асосида турли заргарлик буюмларини ясашди.
Шуни алоҳида таъкидлаш жоизки, болажонлар учун энг эсда қоларли кун ҳарбий хизматчилар билан дилдан кечган суҳбат бўлди.
Очиқ мулоқот давомида болалар бир-бирларига навбат бермаган ҳолда, ҳарбий хизматчилардан қандай қилиб иродани чиниқтириш мумкинлиги, Ватан ҳимоячилари сафига қўшилиш учун нималарга аҳамият бериш лозимлиги, кучли ва жасур бўлиб етишиш учун қайси спорт тури билан шуғулланиш кераклиги бўйича саволлар бериб, керакли маълумотларга эга бўлишди
