Миллий гвардия Тошкент вилояти бўйича бошқармасида "Дунёдаги энг кучли жангчи бу ўзбек жангчиси" шиори остида ватанпарварлик тадбири ўтказилди.
Мазкур тадбирга Тошкент вилояти Миллий гвардия бошқармаси бошлиғининг ўринбосари, фахрийлар кенгаши раиси, Ўзбекистон Ёшлар иттифоқи Тошкент вилояти кенгаши бўлим бошлиғи, хизмат давомида юқори натижаларга эришган харбий хизматчилар ҳамда Нурафшон шаҳрида жойлашган 9-сонли умумтаълим мактабининг 9-10 ва 11-синфлардан иборат 80 нафар ўқувчи-ёшлари ташриф буюришди.
Тадбирни Миллий гвардия Тошкент вилояти бўйича бошқармаси бошлиғи бугунги кунда ўқувчи-ёшлар учун яратилаётган имкониятлар ҳақидаги нутқи билан тадбирни очиб берди.
Унда фахрий устозлар "Дунёдаги энг кучли жангчи бу ўзбек жангчиси" шиори остида миллий ғоя ва Ватанга садоқат руҳида тарбиялаш, уларнинг қалби ва онгига Ватан ҳимояси шарафли ва муқаддас бурч эканини чуқур сингдириш, қадимий тарихимиз ва маданиятимиз, жонажон Ватанимизнинг мустақиллиги ва равнақи йўлида фидокорона курашган миллий қаҳрамонларимиз билан фахрланиш, уларга муносиб бўлиш туйғусини шакллантириш, миллий армиямизнинг қудрати ва салоҳиятига бўлган ишончни кучайтириш, ёшларда ён-атрофимиз ва жаҳонда рўй бераётган сиёсий-ижтимоий жараёнларга миллий манфаатларимиздан келиб чиққан ҳолда ёндашиш кўникмаларини, шунингдек, юрт, оила, ота-она ва фарзандлар ҳимояси халқ ва аждодлар хотираси олдида муқаддас бурч эканини, буюк тарихимиз, улуғ аждодларимизнинг бой маънавий мероси, Жалолиддин Мангуберди, Амир Темур, Заҳириддин Муҳаммад Бобур каби саркардаларнинг жаҳон цивилизацияси ҳамда ҳарбий санъат ривожига қўшган ҳиссаларини ҳамда ўзларининг ҳаёт йўлларидаги бой тажрибалари ва узоқ йиллар мобайнида эришган билим ва кўникмалари ҳақида ўртоқлашдилар.
Шунингдек тадбир давомида ўқувчи-ёшлар учун махсус вазифаларни бажарувчи отряд шахсий таркибининг кўргазмали қўл жанги чиқишлари намойиш этилди. Шу билан бир қаторда ўқувчи-ёшларга малакали мутахассислар томонидан кўргазмали қуроллар ўқув нуқталари яъни харбий техникалар ва қурол-аслахалар, тоғ тайёргарлиги анжомлари, харбий хизматчиларни бир кунлик озиқ-овқат ва кийим-кечак таъминотлари, харбий алоқа воситалари ҳамда тиббий анжомлар билан таништирилиб сўнг улар учун отларда сайр қилиш имкони яратилди.
