Маҳаллий Кенгашлар депутатлари учун семинар ташкил этилди
Жорий йилнинг 12 июнь куни Сенатнинг Ёшлар, хотин-қизлар, маданият ва спорт масалалари қўмитаси томонидан “Болаларни зўравонликнинг барча шаклларидан ҳимоя қилиш тўғрисида”ги Қонун ижросини назорат қилишда депутатларнинг ўрни” мавзусига бағишланган семинар ўтказилди.
Семинардан кўзланган мақсад маҳаллий Кенгашлар депутатларининг соҳа бўйича қонунчиликдаги янгиликлар ва ўзгаришлар юзасидан назарий билимларини ҳамда амалий кўникмаларини ошириш ҳамда мазкур Қонуннинг ҳудудларда самарали ижро этилиши устидан депутатлик назоратини олиб боришдан иборат.
Семинар давомида Олий Мажлиснинг Бола ҳуқуқлари бўйича вакили, масъул ташкилотлар вакилларининг мавзуга доир маърузалари ҳамда сенаторлар, экспертлар, Ёшлар парламенти аъзоларининг фикр-мулоҳазалари эшитилди.
Таъкидланганидек, ҳудудларда болаларнинг ҳуқуқлари, эркинликлари ва қонуний манфаатларини таъминлашда маҳаллий давлат ҳокимияти органларининг бу борадаги фаолияти улкан аҳамиятга эга.
2024 йил ноябрида қабул қилинган ва жорий йилнинг 15 май куни кучга кирган “Болаларни зўравонликнинг барча шаклларидан ҳимоя қилиш тўғрисида”ги Қонун болалар ҳуқуқлари, эркинликлари ва қонуний манфаатларига риоя этиш ҳамда уларни ҳурмат қилишнинг ҳуқуқий асосларини такомиллаштириш, болаларга нисбатан зўравонлик ҳолатларига муросасиз муносабатда бўлиш ва зўравонлик содир этган шахсларга нисбатан жавобгарликнинг муқаррарлигини таъминлашга хизмат қилаётгани қайд этилди.
“Ўзбекистон Республикаси Олий Мажлисининг Бола ҳуқуқлари бўйича вакили (Болалар омбудсмани) тўғрисида”ги Қонунга кўра эса Бола ҳуқуқлари бўйича вакилнинг Қорақалпоғистон Республикаси, вилоятлар ва Тошкент шаҳридаги вакилларини тайинлаш белгиланган. Шу муносабат билан Болалар омбудсмани томонидан барча ҳудудларда тайинланган вакиллар семинар иштирокчиларига таништирилди. Шунингдек, Бола ҳуқуқлари бўйича вакилнинг минтақавий вакиллари фаолиятини ташкил этиш юзасидан тегишли тавсиялар ҳамда ҳуқуқлари ва вазифалари бўйича тушунтиришлар берилди.
Семинар давомида ушбу Қонуннинг ижросини депутатлар томонидан назорат қилиб бориш муҳимлиги таъкидланиб, бир қатор тавсиялар илгари сурилди.
Хусусан, Қонуннинг мазмун-моҳиятини аҳоли ўртасида тушунтириш, тарғибот-ташвиқот ишларини олиб бориш, ҳудудларда ижро этилиши устидан депутатлик назоратини ўрнатиш, ижтимоий ҳимояга муҳтож болаларни ва уларнинг оилаларини қўллаб-қувватлаш масалаларини назорат-таҳлил тартибида ўрганиб бориш, шунингдек, минтақавий вакилларнинг тегишли ҳудудда бола ҳуқуқлари, эркинликлари ва қонуний манфаатларининг ҳимоя қилиниши ҳолати тўғрисидаги маърузаларини кўриб чиқиш ва муаммоларни бартараф этиш бўйича таъсирчан чоралар кўриш юзасидан тавсиялар берилди.
