"Меҳрибонлик уйи", "Болалар уйи", "Оилавий болалар уйи" тарбиячилари, психологларининг малакаси оширилмоқда
Ўзбекистон Республикаси Президентининг 2021 йил 9 августдаги “Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш чора-тадбирлари тўғрисида”ги ПҚ-5215-сонли Қарорининг 6-бандида Миллий гвардия Халқ таълими вазирлиги билан биргаликда Жамоат хавфсизлиги университетида ўқув-тарбия муассасалари тарбиячиларининг малакасини ошириш ва қайта тайёрлашни йўлга қўйиш вазифаси белгиланган.
Меҳрибонлик уйлари ва Болалар шаҳарчалари тарбиячилари малакасини оширилиши юзасидан ўқув курслари Қорақалпоғистон Республикаси, вилоятлар ва Тошкент шаҳрида жойлашган Меҳрибонлик уйлари ва Болалар шаҳарчаларида 2021 йил октябрь ойидан 2022 йил май ойигача сайёр дарс машғулотларини ташкил этиш орқали амалга оширилиши кўзда тутилган.
Хусусан, Ўзбекистон Республикаси Жамоат хавфсизлиги университети Ҳарбий-ватанпарварлик, маънавий-маърифий тарбия ва ёшлар билан ижтимоий ишлаш кафедраси профессор-ўқитувчилари томонидан 22 ноябрь – 4 декабрь кунлари Бухоро вилояти Бухоро шаҳрида жойлашган 32-сонли Меҳрибонлик уйи, Оилавий болалар уйи тарбиячилари, психологларининг малакаси оширилмоқда.
Бунда малака ошириш юзасидан ўқитиладиган ўқув дастури 3 модулни ўз ичига олган бўлиб, Ижтимоий, Умумкасбий, Мутахассислик фанлари йўналишида тарбиячилар иш фаолиятида зарур билим, кўникма ва малакалар билан қуроллантиришга қаратилган. Хусусан, ижтимоий етимликни олдини олиш соҳасидаги давлат сиёсати ва тарбияланувчиларни ватанъарварлик руҳида тарбиялаш, етим ва ота-она қарамоғидан маҳрум бўлган болаларни ҳимоялаш соҳасидаги халқаро ва миллий қонунчилик, тарбиячининг касбий компетентлиги ва креативлиги, инклюзив таълим муаммолари каби мавзуларни ўз ичига олган.
Шу кунга қадар, Жамоат хавфсизлиги университети Ҳарбий-ватанпарварлик, маънавий-маърифий тарбия ва ёшлар билан ижтимоий ишлаш кафедраси профессор-ўқитувчилари томонидан Меҳрибонлик уйлари ва Болалар шаҳарчалари тарбиячилари малакасини оширилиши юзасидан тарбияланувчилар ёш хусусиятларини инобатга олган ҳолда 4 тоифага (мактабгача ёш, кичик мактаб ёши, ўсмирлик, ўспиринлик ёш даврлари) ажратилган ўқув дастурлари 144 соатга мўлжалланган ҳолда ишлаб чиқилди. Ушбу ўқув дастурлари Халқ таълими ва Мактабгача таълим вазирликлари билан келишилди. Шунингдек, ушбу дастур юзасидан дидактик материаллар, ўқув услубий мажмуалар ишлаб чиқилди.
Ушбу ўқув курсини ўтказилиши даври мобайнида Ҳарбий-ватанпарварлик, маънавий-маърифий тарбия ва ёшлар билан ижтимоий ишлаш кафедраси профессор-ўқитувчилари томонидан қуйидаги қўшимча ишларни манзилли амалга оширишлари режалаштирилган:
ўқув-тарбия муассасалари психологлари малакасини ошириш;
Меҳрибонлик уйи ва Болалар шаҳарчаларида тарбияланаётган болаларнинг ижтимоий-психологик ҳолатини ўрганиш;
Соғлиқни сақлаш вазирлиги тассаруфидаги Болалар уйи педагог ходимлари фаолиятини ўрганиш ва мониторинг қилиш;
Оилавий Болалар уйи фаолиятини ўрганиш ва мониторинг қилиш.
Ушбу ишларни амалга ошириш юзасидан “Меҳрибонлик уйлари ва болалар шаҳарчалари фаолиятини тубдан ислоҳ қилиш юзасидан чора-тадбирлар режаси” ишлаб чиқилган ва Халқ таълими, Мактабгача таълим, Соғлиқни сақлаш вазирликлари билан келишилган.
