Жорий йилда мамлакатимиз Президенти раҳбарлигида ногиронлиги бўлган, ота-она қарамоғидан маҳрум ва етим болаларни давлат томонидан қўллаб-қувватлашнинг янги тизимини жорий этиш бўйича ўтказилган видеоселектор йиғилишида меҳрибонлик уйлари ва махсус мактаб интернатларини Ўзбекистон Республикаси Миллий гвардияси масъуллигига ўтказиш таклифи илгари сурилган эди. Қисқа вақт мобайнида ушбу йўналишда Миллий гвардия тизимида самарали ишлар қилинишига эришилмоқда. Хусусан, Самарқанд вилоятида бу борада қувонарли натижаларни кўриш мумкин. Меҳрибонлик уйи тарбияланувчиларини ижтимоий муҳитга мослаштириш ва ота-она меҳридан баҳраманд бўлиб вояга етишлари учун "Оилавий болалар уйи" лари ташкил этилмоқда. Маълумотларга қарайдиган бўлсак, шу кунга қадар Миллий гвардия Самарқанд вилояти бўйича бошқармаси, вилоят ҳокимлиги ва халқ таълими бошқармаси кўмагида 1-сонли Меҳрибонлик уйининг 28 нафари ўз оиласи ва яқинлари бағрига қайтарилган, 4 нафари фарзандликка ва 27 нафари "Оилавий болалар уйи"га ота-она қарамоғига топширилган.

Бугунги кунда Самарқанд вилоятининг 4 та туманида жами 5 та "Оилавий болалар уйи" очилишига эришилди. Жорий йилнинг 7 декабрь куни эса ана шундан файзли уйлар сони Оқдарёда туманида яна биттага кўпайди.

Эрта тонгдан Оқдарё туман ҳокимлиги ҳамда Миллий гвардия Самарқанд вилояти бўйича бошқармаси раҳбарияти тумандаги Навоий МФЙ Боғибаланд кўчаси 10 уйда истиқомат қилувчи Фахриддиновлар оиласи томонидан ташкил этилаётган "Оилавий болалар уйи"нинг очилиш маросимига ташриф буюришди.

Тадбирда туман ҳокими Н.Сулаймонов ҳамда вилоят Миллий Гвардия бошқармаси бошлиғи Л.Яхшиликовлар сўзга чиқиб, 6 нафар (5 нафар ўғил ва 1нафар қиз) меҳрибонлик уйи тарбияланувчиларини ўз оиласи бағрига олиш билан улкан хайрли ишни амалга оширган ушбу оила аъзоларини қутлашди.

Шундан сўнг болажонлар хонадонда улар учун яратилган шарт-шароитлар билан танишишди.

Тадбир давомида мутасадди раҳбарлар ва туман ҳокимлиги томонидан келтирилган турли совғалар яхши ниятлар ила хонадон эгаларига топширилди.