“Мен ватанпарварман” шиори остида ўқувчи-қизлар иштирокида кўрик танлов ўтказилди
Хоразм вилоятининг чекка махалларидан бирида “Мен ватанпарварман” шиори остида ўқувчи-қизлар иштирокида кўрик танлов ўтказилди.
Урганч ҳарбий прокуратураси, Миллий гвардия Хоразм вилояти бўйича бошқармаси, Қўриқлаш бошқармаси ҳамда ҳарбий қисм ва муассасалар билан ҳамкорликда олис ҳудуд ва чекка қишлоқларда ўқувчи-қизлар ўртасида “Мен ватанпарварман” шиори остида кўрик-танловлар ўтказиб келинмоқда.
Ана шундай тадбирлардан бири Хоразм вилоятининг энг олис ҳудудларидан бири Тупроққалъа туманининг чегара олди масканида жойлашган 115-сонли мактабда ўқувчи-қизлар иштирокида ўтказилди.
Бундан кўзланган асосий мақсад, ўқувчи қизларни чинакам ватанпарвар қилиб тарбиялаш, уларнинг Миллий армиямиз ҳақидаги тассавурларини янада бойитиш, чекка қишлоқлардаги иқтидорли қизларни қўллаб-қувватлаш ҳамда қизларимизни мардлик-жасурликда йигитлар каби шижоатли эканликларини кўрсатиб беришдан иборат.
Кўтарингки руҳда ўтган ушбу кўрик-танловда 15-сонли мактабнинг «Тўмарис» ва «Жасорат» жамоалари ўзаро беллашди.
Кўрик-танловда ўқувчи қизларнинг билимлари синовдан ўтказилиб, уларнинг Она Ватанга муҳаббат, садоқат, тинчлик қадри, буюк аждодларимиз ва маърифатпарвар жадидларимиз сиймоси, шунингдек, Тўмарис ва бошқа аждоларимиз жасорати акс этган саҳна кўринишлари билан чиқишлар қилинди.
Бундан ташқари “Ватанпарварлик мени тасаввуримда” мавзусида ўз қарашларини тасвирий санъат, қўл меҳнати, шеърият, жонли ижро ва бошқа ижодий чиқишларда намойиш этди. Ҳар-бир жараён ҳакамлар томонидан муносиб баҳоланиб борилди.
Кўрик танлов якуни бўйича ғолиб ва совриндорлар, фаол ўқувчи қизлар ва бошқа иштирокчилар фахрий ёрлиқ, диплом ҳамда қимматбаҳо эсдалик совғалари билан тақдирландилар.
