Меҳр-оқибат оламни гўзалроқ, инсонларни эса баҳтлироқ қилади
Бундан бир йил муқаддам 25 августда Ўзбекистонда биринчи “TASKIN” хосписи ташкил этилган эди. Ўтган бир йил давомида “Taskin” да 70 га яқин онкологик касалликка чалинган болажонлар паллиатив ёрдам олдилар, афсуски шундан 40 нафар жажжи фаришталар ҳаётни тарк этдилар.
Ушбу сатрлар хоспис ташкилотчиси Ezgu Amal фонди сайтидан олинган бўлиб, фонд сайтига ҳавола билан Тошкент шаҳрида яшовчи Атаевлар оиласи бўлишди.
Нурулла ва Камила Атаевлар 21 ва 22-сонли “Меҳрибонлик” уйларининг 5 нафар ҳамда SOS болалар маҳалласининг барча тарбияланувчиларини меҳр ва муҳаббат билан ўз бағрларига олиб, оилавий болалар уйини ташкил қилган жуфтлик ҳисобланадилар.
Улар хоспис эшиклари очилган илк кунларданоқ бу ердаги болажонлар ҳолидан хабар олиб келадилар. Атаевларнинг ўғил-қизлари бўлмиш хосписдаги болажонлар учун мулоқот ва табассум жуда қувончлидир. Шуни инобатга олган оилавий болалар уйи фарзандлари бу ердаги болажонларга турли қўшиқлар ва ўйин-кулгу билан кўтаринки кайфият улашишга ҳаракат қиладилар.
Хосписнинг илк туғилган кунига мазкур оиланинг фарзандлари бўлмиш 15 ёшли Алексей, 14 ёшли Денис ва 16 ёшли Асадбек айиқлар костюмида аниматорлар ролини бажариб, хосписдаги болажонлар билан рақсга тушиб, уларнинг кўнглини кўтардилар. Оиланинг қизалоғи Хумайра эса байрам тадбирида ота-она, дўстлик ва Ватанга муҳаббат туйғуларини тараннум этувчи қўшиқларни ижро этди.
Тадбир якунида Ezgu Amal фонди томонидан хосписнинг содиқ дўстлари бўлмиш оилавий болалар уйи фарзандларига “Taskin”нинг ривожи йўлида қўшаётган ҳиссалари учун ташаккурнома топширилди.
Ўз навбатида ота-оналар фарзандлари онгига сингдиришаётган меҳр-оқибат, соф фикрлилик, эзгулик сингари сифатлар болалари қалбларида акс-садо бераётганидан жуда фахрланишди.
