«Меҳр дафтари» нинг мақсади – болалар иқтидорини қўллаб-қувватлаш
Республикамизнинг барча ҳудудларида “Меҳр дафтари” электрон платформаси маълумотлар базасини яратиш тартиби ва тамойилларини ўрганиш бўйича ўқув- семинарлари ўтказилмоқда. Семинар ташкилотчиларининг вазифаси ота-она қарамоғисиз қолган болаларни қўллаб-қувватлаш тизимининг моҳияти ва аҳамиятини масъулларга етказишдан иборат. “Меҳр дафтари” болаларга ўзи узоқ вақтдан бери орзу қилган бирор буюмни шунчаки тақдим этиш учун эмас, балки унинг янги билим, кўникмага бўлган истагини қўллаб-қувватлаш ва болаларнинг ижтимоийлашувига ҳисса қўшиш учун жорий қилинган. Бундан ташқари, тизим болаларни васийликка олган ёки васийликни расмийлаштирган оилаларни рағбатлантиришни назарда тутади.
Ўқув -семинарининг навбатдаги курслари Фарғона, Андижон, Наманган, Хоразм, Сирдарё, Бухоро, Навоий, Жиззах вилоятларида бўлиб ўтди. Семинарлар Жамоат хавфсизлиги университети профессор-ўқитувчилари ҳамда Миллий гвардия Марказий девони тарбиявий-мафкуравий ишлар бошқармаси вакиллари иштирокида ўтказилди.
Семинар иштирокчиларига Вазирлар Маҳкамасининг 2022-йил 17-февралдаги “Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш чора-тадбирлари тўғрисида” ги Қарори мазмун моҳияти атрофлича тушунтирилди. Шунингдек, “Меҳр дафтари” маълумотлар базасини шакллантириш, электрон платформадан чиқариш тартиби ва тамойилларига алоҳида эътибор қаратилди. Семинар иштирокчиларига тизимдан кўзланган мақсад болаларнинг орзу ва интилишларини рўёбга чиқариш, ижтимоийлашувига кўмаклашиш, уларни ўз тарбиясига олган оилаларни рағбатлантиришдан иборат экани таъкидланди. Иштирокчилар, шунингдек, ота-оналар ва бошқа қонуний вакилларнинг болаларни васийликдан маҳрум қилиш сабабларини ўрганиш усуллари ҳамда аниқланган муаммоларни бартараф этиш ва олдини олиш бўйича комплекс чора-тадбирлар тўғрисидаги маърузани тингладилар. Таъкидланганидек, жорий йилнинг сентябрь ойидан бошлаб оилавий болалар уйлари фаолияти ва “Меҳр дафтари” жамғармаси маблағларининг мақсадли сарфланиши устидан депутатлик назорати ўрнатилди. Семинар давомида иштирокчилар ўзларини қизиқтирган саволларни бериш ва уларга атрофлича жавоб олиш, иш тажрибаси ва муаммоларни ҳал этиш чора-тадбирларини ҳамкасблари билан муҳокама қилиш имконига эга бўлдилар.
Эслатиб ўтамиз, мазкур семинар Вазирлар Маҳкамасининг 2022-йил 17-февралдаги “Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш чора-тадбирлари тўғрисида” ги 26-сонли Қарори ҳамда ҳокимлик ва бошқа манфаатдор тузилмаларнинг болаларни ҳимоя қилиш секторлари мутахассислари учун Миллий гвардия қўмондонининг тегишли буйруғига асосан ташкил этилмоқда.
Республикамизнинг барча ҳудудларида ўқув- семинарлари давом этмоқда.
