Меҳрибонлик уйи тарбияланувчиларининг Ҳайвонот боғида ташкил этилган хайрия кўргазмасига ташрифи
Тошкент ҳайвонот боғи ҳудудида «Уйга йўл 2» хайрия кўргазмаси бўлиб ўтмоқда. «Ҳаёт» бошпанасиз ҳайвонларни ҳимоя қилиш жамияти ННТ, «Мушуккент» лойиҳаси ва Тошкент ҳайвонот боғи томонидан ташкил этилган хайрия кўргазмаси 2023 йил 6-7 май кунлари ўтказилиши режалаштирилган. Мазкур лойиҳадан кўзланган мақсад шундан иборатки, қаровсиз қолган ёки кўчадан топиб олинган кучуклар ва мушукларга янги уй, кўргазмада сотилаётган маҳсулотлардан улар учун озиқ овқат харид қилишдан иборат. Барча ҳайвонлар ювиб таралган, эмланган ва паспортга эга. Ёшларни ҳайвонларга бўлган меҳрини ошириш, ҳайвонот олами билан ошно бўлишга ундаш мақсадида пойтахтимиздаги 22 ва 30-сонли Меҳрибонлик уйи тарбияланувчилари ҳам мазкур кўргазмага таклиф этилди. Кўргазма давомида кўчаларда қаровсиз қолган ва яхши парвариш, муолажалар натижасида хасталикдан тузалган кучук ва мушукларни томоша қилган ёшларнинг ҳайвонот оламига бўлган муносабатлари ижобий томонга ўзгарарди.
Шу билан бирга, болажонлар учун турли мусиқий чиқиш ва рақслар ижро этилди. Интерфаол усулда ҳайвонот оламига доир савол жавоблар бўлиб ўтди. Ўқувчи ёшлар томонидан чизилган расмлар кўргазмаси ҳам кўпчиликда катта таассурот қолдирди.
