Миллий гвардия ҳарбий хизматчилари болалар ва катталарга қиш кунлари ёнғин ва ис газидан ҳимояланиш қоидаларини эслатиб ўтишди
Ушбу қишнинг қорли кунларида Миллий гвардия ҳарбий хизматчилари ва ходимлари Республика бўйлаб “Меҳрибонлик” уйлари ва бошқа таълим-тарбия муассасалари, шунингдек, оилавий болалар уйларига ташриф буюришди. Ушбу ташрифлардан кўзланган мақсад иситиш тизимлари, маиший иситиш электр жиҳозларининг яроқлилигини текширишдир.
Шу билан бирга, Миллий гвардия вакиллари болалар, тарбиячилар, тутинган ва ўрнини босувчи ота-оналар билан ёнғин хавфсизлиги мавзусида суҳбатлар ўтказдилар. Улар катталар ва болаларга қишда ёнғин келиб чиқишининг асосий сабаблари, иситиш воситаларидан фойдаланиш бўйича кўрсатмаларга риоя қилмаслик қандай оқибатларга олиб келиши мумкинлиги ҳақида тушунчалар беришди.
Жумладан, ўзининг ва атрофдагиларнинг ҳаётига бепарволик ва масъулиятсизлик натижасида печлар, мўри ва электр симларини ўз вақтида яроқлилигини билмаслик қандай фожиали оқибатларга олиб келишига мисоллар келтирилди.
Шунингдек, ис газининг ҳосил бўлиши, нима учун у “тилсиз қотил” деб аталиши, ис гази билан заҳарланишнинг олдини олиш учун қандай чоралар кўриш зарур экани тушунтирилмоқда. Ҳарбий хизматчилар ва ходимлар катталар ва болаларга ёнғин ёки газ сизиб чиққан тақдирда дарҳол мурожаат қилиниши керак бўлган фавқулодда вазиятлар хизматлари рақамларини яна бир бор эслатиб ўтишди.
Гвардиячилар тақдим этган фотосуратларда бўлса, Тошкент шаҳри ҳамда Самарқанд, Тошкент, Сирдарё вилоятларидаги оилавий болалар уйлари фарзандлари ва "Меҳрибонлик" уйлари тарбияланувчилари, шунингдек, SOS Ассоциациясининг Болалар шаҳарчасида ўтказилаётган иситиш тизимлари, маиший иситиш электр жиҳозларининг яроқлилигини текшириш жараёнлари ва ёнғин хавфсизлиги мавзусида болалар ва катталар иштирокидаги суҳбатларнинг бориши билан танишишингиз мумкин. Бу каби тадбирлар республикамиз бўйлаб давом этмоқда.
