10 декабрь – Ўзбекистон Республикаси Давлат мадҳияси қабул қилинган кун.
10 декабрь – Ўзбекистон Республикаси Давлат мадҳияси қабул қилинган кун. Ўттиз йилдан ошиқроқ вақт ўтибдики, бу мусиқа ер юзида халқимиз ҳурлиги, давлатимиз мустақиллиги, ғурур ва ифтихоримиз, шону шавкатимиз тимсоли сифатида янграб келмоқда. Унинг мусиқаси муаллифи – буюк бастакор, беназир истеъдод соҳиби Мутаваккил Бурҳонов.
Ўзбекистон халк артисти Мутал (Мутаваккил) Музаййинович Бурҳонов 1916 йил 5 май куни Бухоро шаҳрида таваллуд топди. Тенгқурлари орасида нозик қалби ва теран мушоҳадаси билан ажралиб турадиган Мутаваккил ўша даврнинг машҳур хофиз ва бастакорлари Домла Ҳалим Ибодов, Ота Жалол, Ота Ғиёс, Левича Ҳофиз сингари улуғ санъат фидойилари изидан борди, мусиқа басталашни чин дилдан орзу қилди. Ва шу мақсади сари тинмай интилди, курашди, ўқиб ўрганди ва ниҳоят орзулари рўёбга чиқди. Ўзбеклар орасида энг севимли қўшиқларга айланган “Дўппи тикдим” ва «Мафтунингман» қўшиқлари мусиқасини басталаган. Бастакор оила қурмаган ва камтарона ҳаёт кечирган.
Бугун буюк бастакорни хотирасини ёд олиш ва унга ҳурмат бажо келтириш мақсадида, Миллий гвардия Бухоро вилояти бўйича бошқармаси, Бухоро вилояти Халқ депутатлари Кенгаши вакиллари, бир қатор ташкилотлар ва кенг жамоатчилик вакиллари иштирокида Мутал Бурхоновнинг қабрларига гул қўйилди.
Шундан сўнг, тадбир иштирокчилари Бухоро шаҳар Баҳоуддин Нақшбанд кўчасида ташкил этилган Мутал Бурхонов уй-музейига ташриф буюриб буюк бастакорнинг ҳаёт ва ижод йўллари билан яқиндан танишиш бахтига мушарраф бўлишди.
Буюк бастакор худди бугунги кунларни башорат қилгандай шундай деган эди: “Бутун умрим давомида одамлар ёдида қоладиган, сира эскирмайдиган, ҳамма жўр бўлиб куйлайдиган қўшиқ яратиш нияти билан яшадим. Ниятим соф эди. Мен Давлат мадҳияси мусиқаси муаллифи сифатида бугун ана шу ниятимга етдим. Шуни биламанки, мени халқим ҳеч қачон унутмайди.
