Ўн йиллик уй орзуси ушалди
Бу йили Гулистон шаҳар Болалар шаҳарчаси собиқ тарбияланувчиси Мадина Юнусова таваллуд кунини ўзининг шахсий уйида нишонлайди. Мадина бу онларни ўн йил орзу қилган. Таълим-тарбия муассасасини битиргандан сўнг, Мадина Сирдарё вилоятидаги яшаш шароити оғир аҳволда бўлган ётоқхонага жойлашган. Бундан хабар топгач Миллий гвардия Сирдарё вилояти бўйича бошқармаси ва ҳокимият вакилларидан ташкил топган ишчи гуруҳ Мадинани 30 ёшга тўлмаган ва уй жойга муҳтож “Меҳрибонлик” уйи битирувчилари рўйхатига қўшди.
Ва яқинда Мадинанинг орзуси ушалди: унга ҳаммом ва ошхона ҳамда энг керакли жиҳозлар билан таъминланган шинам хонадон калитларини тақдим этишди.“Бахтиёрман, менинг орзуим амалга ошди, буни сўз билан тарифлай олмайман” – дейди М. Юнусова ва сўзининг давомида давлат раҳбари ҳамда барча орзуси ушалишида ўз ҳиссасини қўшганларга миннатдорчилик билдирди.
