ГЎЗАЛ ПОЙТАХТИМИЗГА САЁҲАТ
Яқинда Хоразм вилоятининг Хива шаҳрида истиқомат қилувчи уч оила фарзандлари оналари Виктория Юсупова, Феруза Аллабергенова ва Роза Маткаримовалар билан биргаликда Тошкент шаҳрига ташриф буюришди. Пойтахт уларда катта таассурот қолдирди. "Бу ерда жуда кўп гўзал бинолар, кўплаб меъморий обидалар, истироҳат боғлари ва сайр қилиш учун майдонлар бор. Тошкент ўз тарихини авайлаб сақлайдиган замонавий шаҳардир", - дея ўз таассуротлари билан ўртоқлашди болалар.
Хивадан келган меҳмонларни Япон ва ботаника боғлари, Тошкент телеминораси ва албатта, Ашхобод истироҳат боғи ҳайратда қолдирди. Болалар ташриф буюрган ҳар бир жой уларга узоқ мамлакатлар флораси, япон Тош боғи анъаналари билан танишиш имконини берди.
Тошкент телеминораси ходимларининг телеминора яратилиш тарихи ҳақидаги ҳикояси ёш тингловчиларни руҳан архитектура оламига ўтказди, шаҳарга энг баланд нуқтадан томоша қилиш имконияти уларга пойтахтнинг бутун гўзаллигини тақдим этди. Шунингдек, болаларнинг энг машҳур "Ашхобод" истироҳат боғида ўтказилган қизиқарли соатлар ва сайрлар унутилмас бўлди.
