НАВБАТДАГИ ОИЛАВИЙ БОЛАЛАР УЙИ ПРОФИЛАКТИКА ИНСПЕКТОРИ ХОНАДОНИДА ТАШКИЛ ЭТИЛДИ
Давлатимиз раҳбарининг 2021 йил 9 август кунидаги “Бола ҳуқуқлари кафолатларини таъминлаш тизимини янада такомиллаштириш чора-тадбирлари тўғрисида”ги ПФ-6275 сонли Фармонининг ижроси юзасидан ўсиб келаётган ёш авлодни оила бағрида тарбиялаш мақсадида, Республика миқёсида “Оилавий Болалар уйлари” ташкил этилмоқда.
Жумладан, навбатдаги “Оилавий Болалар уйи” Хўжайли туманида жойлашган “Муртазабий” маҳалла фуқаролар йиғинида яшовчи Хўжайли туман ИИБ профилактика инспектори Амангелди Атамуратов ва турмуш ўртоғи Садоқат Базарбаевалар хонадонида ташкил этилди.
“Оилавий Болалар уйи”нинг очилиш маросимига Қорақалпоғистон Республикаси бўйича Миллий гвардия бошқармаси бошлиғи полковник М.Юсупов, Қорақалпоғистон Республикаси Ички ишлар вазири полковник А.Темирханов, Туман ҳокими Ж.Ермашев, Нукус ҳарбий прокурори адлия полковниги Ф.Бегашев, Қорақалпоғистон Республикаси Қўриқлаш бошқармаси бошлиғи подполковник М.Калжанов, сектор раҳбарлари, Мехрибонлик уйи директори С.Сон, Миллий гвардия ҳарбий хизматчи ва ходимлари, кенг жамоатчилик вакиллари иштирок этишди.
Тантанали тадбирда Қорақалпоғистон Республикаси бўйича Миллий гвардия бошқармаси бошлиғи полковник М.Юсупов сўзга чиқиб, хонадон эгаларини бошлаган эзгу ишлари билан табриклаб, Миллий гвардия номидан ташаккурнома ва байрам совғасини топширди.
Ундан сўнг, Қорақалпоғистон Республикаси Ички ишлар вазири полковник А.Темирханов сўзга чиқиб, давлатимиз томонидан амалга оширилаётган ислоҳатларга муносиб ҳиссасини қўшаётган хонадон эгалари Амангелди Атамуратов ва турмуш ўртоғи Садоқат Базарбаеваларга ўз миннатдорчилигини билдириб, фарзандларининг камолини кўришини тилаб қолди.
Бундан сўнг, меҳмонлар хонадон остонасида лента кесиб, “Оилавий Болалар уйи”ни тантанали тарзда очишди.
Тадбир иштирокчилари хонадонга ташриф буюриб, эзгу ниятда “Яшил макон” шиори остида дарахт ниҳолларини экишди ва болажонлар учун яратилган шароитлар билан танишди.
