Болалар омбудсманининг Қорақалпоғистон Республикасидаги Оилавий болалар уйларига ташрифи.
Куни кеча Олий Мажлиснинг Бола ҳуқуқлари бўйича вакили (Болалар омбудсмани) А.Юнусова, Олий Мажлиснинг Инсон ҳуқуқлари бўйича вакили-котибиятининг Бола ҳуқуқларини таъминлаш сектори мудири С.Раҳматов ҳамда "Меҳрибонлик" болалар муассасалари билан ишлаш бошқармаси вакили подполковник Б.Аширматова Қорақалпоғистон Республикасида ташкил этилган Оилавий болалар уйларига ташриф буюрди.
Ташрифдан кўзланган мақсад болаларнинг яшаш шароити, уларнинг ота-оналари ва бошқа болалар билан муносабатлари, ёзги таътилни қандай ўтказаётганлиги ҳамда бўш вақтларида қандай машғулотлар билан бандлигини ўрганиш. Шу билан бирга, Ота-оналар ва болалар билан бўлган суҳбатда янги оилалардаги муҳит ҳамда болажонларга бўлаётган муносабатлар ўрганилди.
Шу кунгача А.Юнусова бошчилигидаги делегация 5 та хонадонга ташриф буюрди. Булар Хўжайли туманида яшовчи 6 нафар фарзандни ўз бағрига олган Жамшид Ўразбоевич ва Дилноза Ибрагимовна, 5 нафар фарзандни тарбиялаётган Ўразбай Хажабаэвич ва Турсунова Муяссар ҳамда 6 нафар қизни тарбиялаётган Халмурат Султонмуратович ва Гулбаҳор Жумабоэвналар оиласи.
Шунингдек, Болалар омбудсмани ҳам Тахиатош туманида истиқомат қилувчи икки оила: 5 нафар фарзандни тарбиялаган Дилдора Бахтияровна ва Бекзод Муратбаевич ҳамда 7 нафар фарзанд тарбияси билан банд бўлган Аллабай Маркабаевич ва Арзимова Жузумгуллар хонадонида бўлди.
Дўстона муҳитда бўлган суҳбатда соғломлаштириш оромгоҳларида ҳордиқ чиқарган болажонлар ўз таассуротларини меҳмонларга сўзлаб берди.
Айни пайтда оромгоҳга қадар вақт бор. Болалар фурсатдан фойдаланиб, ўз қўллари билан қўғирчоқлар ясашни, турли мавзуларда расмлар чизишни, шунингдек, чолғу асбобларида куйлар чалиб қўшиқлар куйлашни ўрганмоқда.
Учрашув сўнггида Болалар омбудсмани болаларга бадиий ва ўқув адабиётлари тўпламини совға қилди.
Қорақалпоғистон Республикасига ташрифи давомида А.Юнусова Тахиатош туманида жойлашган Болалар уйида ҳам бўлиб, у ерда болажонлар учун яратилган шароитларни ўрганди ва тиббиёт ходимлари билан мавжуд бўлган муаммолар ҳамда эҳтиёжлар ҳақида суҳбатлашди.
