Ёшларни юртга садоқат ва ҳурмат руҳида тарбиялаш, улар қалбида ватанга муҳаббат ҳиссини шакллантириш мақсадида навбатдаги очиқ эшиклар куни ташкил этилди
Эртанги кунимиз эгалари бўлмиш ёшларни ватанпарварлик, юртга садоқат ва ҳурмат руҳида тарбиялаш, ватанни ҳимоя қилиш ҳар бир йигит-қизнинг муқаддас бурчи эканлигини англатиш, ҳарбийлик нақадар шарафли ва машаққатли касб эканлигини ҳис эттириш мақсадида Миллий гвардия Наманган вилояти бўйича бошқармасида навбатдаги очиқ эшиклар куни ўтказилди.
Тадбирда Наманган вилоятидаги олий таълим муассасалари талабалари, шунингдек, Исҳоқхон Ибрат номидаги ижод мактаби ўқувчилари фаол иштирок этдилар. Ушбу тадбир ёшларга ҳарбий касбнинг шарафли ва бир вақтнинг ўзида масъулиятли эканлигини яқиндан тушунишга имкон берди.
Тадбир давомида иштирокчилар учун махсус ҳарбий техника ва қурол-яроғлар намойиши уюштирилди. Шунингдек, ҳарбий хизматчиларнинг аскарликка хос маҳоратлари кўргазмали чиқишлари томошабинларга тақдим этилди. Бу чиқишлар ёшларда ватан ҳимояси йўлидаги фидойиликка бўлган қизиқишни кучайтирди.
Тадбирнинг яна бир қизиқарли қисми спорт ва маданий тадбирлардан иборат бўлди. Камондан отиш бўйича маҳорат дарси, арқон тортиш, шахмат ва шашка каби беллашувлар иштирокчиларда катта таассурот қолдирди.
