Оилавий болалар уйлари Миллий гвардия эътибор марказида
Аввал хабар берганимиздек, олий таълим муассасаларига ўқишга кириб мустақил ҳаётга қадам қўйган оилавий болалар уйи фарзандлари ва собиқ тарбияланувчилар ўқиб, истиқомат қилаётган талабалар турар жойларида яратилган шароитларни ўрганиш мақсадида Миллий гвардия Марказий девони масъуллари жойларга чиқиб ўрганиш ишларини олиб бормоқдалар.
Мазкур жараёнлар мобайнида, Муҳаббат Холиқованинг фарзандлари торт пиширишди. Шу тариқа қизалоқлар ўзининг пазандалик маҳоратини кўрсатиш ҳамда Миллий гвардиянинг ғамхўрлиги, меҳрибонлиги учун миннатдорчилик билдириш истагини рўёбга чиқаришди.
Ушбу хонадон муҳити ўзгача илиқ муносабат ва самимий меҳрга безанган. Холиқова Муҳаббатнинг оила аъзоларига айланган қизалоқлар ва Сардорнинг таъкидлашича барчаси онасининг эътиборидан бошланган. Муҳаббат Шодиевнани болалар Термиз шаҳар 12- сон Меҳрибонлик уйиданоқ она деб чақиришни бошлашган, у ерда Муҳаббат Шодиевна тарбиячи бўлиб ишлаган. Шу сабаб ташкил қилинган оилавий болалар уйига мослашиш болаларда осон кечди. Болалар тарбияси ва уларга берган меҳри учун М. Холиқова кўкрак нишони ва фахрий ёрлиқ билан тақдирланди. “Болаларим менинг омадим”, - дея 4 нафар фарзанднинг онаси, болаларининг тартиб – интизоми ва ўз устида ишлашидан фахрланишини таъкидлади.
Ота-оналарнинг бола тарбиясига чин дилдан ёндашиши ўз самарасини берганини Самарқандлик Севинч мисолида кўришимиз мумкин. Усмоновлар оиласида ташкил қилинган оилавий болалар уйида Севинчдан ташқари яна 6 нафар қизалоқлар тарбияланишади. Ирода Бахрамовна ва Жамолиддин Камолитдинович, бошқа оилалар каби кўп фарзанд ва катта оилани орзу қилишган. Лекин тақдир тақозоси билан улар биргина ўғил фарзанд кўришган. Шу сабабдан 1-сон Меҳрибонлик уйида ишловчи Ирода Бахрамовна турмуш ўртоғига бола асраб олиш таклифини берганда турмуш ўртоғи ҳам уни қўллаб қувватлаган.
Бу йил Усмоновлар оиласида катта байрам нишонланди: уларнинг тўнғич қизи Севинч Самарқанд Давлат тиббиёт университетига талабаликка қабул қилинди.
Миллий гвардия Марказий девон вакиллари ҳам Севинчни табриклаб, аъло баҳоларга ўқишини тилашди. Бундан ташқари ишчи гуруҳ эндиликда Севинч яшайдиган талабалар турар жойида барча яшаш шароитлари мавжудлигига ишонч ҳосил қилиш учун кўздан кечиришди. Шунингдек таълим муассасаси раҳбарлари билан ўзаро алоқада бўлиш учун келишиб олинди.
