“ОИЛАВИЙ БОЛАЛАР УЙИ”НИНГ ФАРЗАНДЛАРИ ЭЪТИБОРДА !
Жорий йилнинг 09 август куни Ўзбекистон Республикаси Президентининг “Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш чора-тадбирлари тўғрисида”ги 5215-сонли Қарори имзоланди.
Мазкур Қарорга кўра, Меҳрибонлик уйлари, болалар шаҳарчалари, оилавий болалар уйлари ҳамда соғлиқни сақлаш вазирлиги тизимидаги болалар уйлари Миллий гвардия хизматига бириктирилди.
Бугунги кунда Қарор ижросини таъминлаш мақсадида, Республиканинг барча вилоятларида, “Меҳрбонлик уй”ларининг тарбияланувчиларини оила муҳитида тарбиялашнинг тубдан янгиланган тизимига ўтиш юзасидан, жойларда “Оилавий болалар уй”лари ташкил этилмоқда.
Шу жумладан, Қашқадарё вилояти Шаҳрисабз шаҳар ҳамда Китоб туманларида ҳам ана шундай янгидан ташкил этилган “Оилавий болалар уйи” болаларининг яшаш турмуш тарзи ва улардаги шарт-шароитларни ўрганиш мақсадида, Ўзбекистон Республикаси Миллий гвардияси Қашқадарё вилояти бўйича бошқармаси бошлиғи полковник У.Азимов ҳамда вилоят ҳалқ таълими бошқармаси болалаларни ижтимоий ҳимоялаш ва қўллаб қувватлаш шуъба мудири Б.Очиловлар ушбу хонадонларга ташриф буюрдилар.
Ташриф давомида, болажонларнинг таклиф ва муаммолари атрофлича ўрганилиб, улар билан дилдан суҳбат қурилди. Миллий гвардия ҳамда хомийлар томонидан туҳфа этилган совға-саломлар, уларга бир олам қувонч бағишлади.
Албатта, мурғак қалбларга кўрсатилаётган бу каби эътибор, болажонларнинг эртанги кунга бўлган ишончини ошишига хизмат қилади.
