Оромгоҳда ёз: Миллий гвардия иштирокидаги ҳарбий-ватанпарварлик тадбирлари давом этмоқда
Миллий гвардия Наманган вилояти бўйича бошқармаси ҳарбий хизматчилари ва қўриқлаш хизмати ходимлари томонидан мактаб ўқувчиларининг «Заркент» болалар соғломлаштириш оромгоҳида ёзги таътилларини мароқли ўтказишларини таъминлаш мақсадида қизиқарли кўнгилочар тадбирлар ташкил этилди.
Шуни таъкидлашимиз керакки, Янгиқўрғон туманидаги сўлим гўшаларда жойлашган оромгоҳ болаларнинг табиат қўйнида ҳордиқ чиқариб, мусаффо ҳаводан нафас олиб, саломатлигини мустаҳкамлаши билан ажралиб туради. Ташкиллаштирилаётган турли спорт, маданий-маърифий, кўнгилочар тадбирлар эса янги билим ва кўникмаларга эга бўлиш, жисмоний, ақлий ва маънавий камол топишга хизмат қилади.
Шундай қилиб, ўтказилаётган тадбирлар болаларда ҳарбийликка бўлган қизиқиши ва ватанпарварлик туйғуларини уйғотиб, Ватанга муҳаббат руҳида улғайишига туртки бўлмоқда.
Ҳарбий техника ва қурол-аслаҳалар кўргазмаси ўғил-қизларда катта қизиқиш уйғотди. Ҳарбий хизматчиларнинг Ватанга хизмат қилишдек шарафли йўлни танлаган ёшлар ҳақидаги ҳикоялари тадбирга ўзгача шукуҳ бағишлади.
Шунингдек, болалар учун камондан отиш бўйича маҳорат сабоқлари ҳамда шахмат, теннис, футбол бўйича мусобақалар ўтказилди. Танлов ғолиблари фахрий ёрлиқлар билан тақдирланди.
