Байрамга туҳфа
Бундан икки йил аввал Фарғона вилоятининг Қўштепа туманида истиқомат қилувчи Соҳибахон ва Илхомжон Аминовлар оиласи тақдир тақозоси билан ота-она меҳридан мосуво бўлган беш нафар қизалоқни ўз қарамоғига олган эдилар. Ушбу жуфт қизалоқлар уларнинг хонадонида меҳр ва муҳаббат кўришлари, таскин топишлари учун барча зарур шарт-шароитларни яратиб беришди. Янги оила аъзоларини эътибор билан қуршаб, улар янги муҳитда ўзларини қандай ҳис қилишаётгани билан чин дилдан қизиқдилар. Биргаликда қизалоқларга берилган уй вазифаларини бажариб, оила даврасида бўш вақтларини китоб ўқиш, фойдали кўрсатувлар, фильмларни томоша қилиш билан ўтказдилар. Куни кеча эса ушбу бахтиёр оила ўз ҳаётларидаги яна бир муҳим ва қувончли воқеани нишонладилар: Ўзбекистон Республикаси Оила ва хотин-қизлар қўмитаси томонидан Соҳибахон Аминова юқори даражадаги мукофот - «Мўътабар аёл» кўкрак нишонига лойиқ топилди.Халқаро хотин-қизлар куни муносабати билан бўлиб ўтган тадбирда Фарғона вилояти ҳокими Хайрулло Бозоров иштирок этиб, қаҳрамонимизга кўкрак нишонини тантанали топширди. Соҳибахон Аминовани мукофот билан табриклаймиз, оила аъзоларига сиҳат-саломатлик тилаб қоламиз!
