Пойтахтимиздаги 21-сонли Меҳрибонлик уйининг беш нафар тарбияланувчиси ўз оиласига эга бўлди.
Шу муносабат билан бугун Олмазор туманида истиқомат қилувчи Юсуповлар оиласида катта тантана. Мазкур тадбирга бахтиёр ота-она ва беш нафар ўғилни табриклаш учун Ўзбекистон Миллий гвардияси қўмондонлиги вакиллари, туман ҳокими Азизхон Умархонов, халқ депутатлари туман Кенгаши депутати Тўрабек Назаровлар ташриф буюрди. 21-сонли Меҳрибонлик уйининг раҳбари Яҳшигул Шодиева болажонларга бахт - саодат тилаб, ота-оналарига итоат этишини, опа-сингилларига мадад бўлишини ҳамда доимо илм олишга интилиш кераклигини таъкидлади.
– Бугун халқаро болаларни ҳимоя қилиш кунида биз бу ерга, айтиш мумкинки, катта оила яратилганлиги боис йиғилиб турибмиз,бунинг замирида албатта рамзий маъно бор - деди туман ҳокимлиги раҳбари ўзининг қутлов нутқида.
Анвар Лазизович ва Саодат Абдурасуловна никоҳларининг дастлабки кунлариданоқ фарзандлари кўп бўлишини орзу қилишган.
Юсуповлар оиласининг 9 хонали катта уйида 13 ёшли Амир ва Дмитрий, 12 ёшли Данил, 15 ёшли Александр ва 8 ёшли Павел учун алоҳида хоналар ажратилган бўлиб, бундай шароитлардан болажонлар жуда ҳам мамнун.
Шуни алоҳида таъкидлаш жоизки, бўлғуси Юрт ҳимоячилари ўз оиласига, опа -сингил ҳамда ака-укаларига эга. Энди улар ҳар доим мушкул вазиятларда кимга мурожаат қилишларини ва ким билан қувончли лаҳзаларини баҳам кўришларини билишади ва бу оила-абадийдир!
