Миллий гвардия масъуллари оилавий болалар уйларидаги вазиятни ўрганиб, янги ўқув йилига тайёргарлигини ўрганмоқда
Шу кунларда Миллий гвардия Марказий аппарати вакиллари болалар билан ишлаш бошқармаси бошлиғи полковник А. Пирматов бошчилигида Фарғона вилоятида хизмат сафарида бўлиб, оилавий болалар уйларига борди.
Бугунги кунда ишчи гуруҳ Фурқат туманидаги саккиз нафар бола вояга етаётган "Меҳрибон қалб", Қўқон шаҳридаги тўрт нафар бола вояга етаётган "Оила болалар бахти”, Қува туманидаги тўрт нафар бола улғаяётган "Саховат меҳридарё" оилавий болалар уйларига борди.
Ташрифлардан асосий мақсад болаларнинг яшаш, ўқиш ва дам олиш шароитларини, мактаб анжомлари ва формаларнинг мавжудлиги, шунингдек, ҳокимларнинг оилавий болалар уйи ташкил этиш тўғрисидаги қарорлари, фарзанд асраб олувчи ота – оналар курсларини тамомлаганлик, малака оширганлик тўғрисидаги сертификатлар каби ҳужжатлар мавжудлигини ўрганиш бўлди. Шу қаторда, болалар мунтазам тиббий кўрикдан ўтказилаётганлиги ҳам текширилди.
Гвардия вакиллари Ота-оналар ва болалар билан индивидуал ҳамда гуруҳ бўлиб суҳбатлашиб,болаларнинг ёзги таътилни қандай ўтказганликлари, ота-оналар ўспиринларни тарбиялашга етарлича эътибор бераётганлиги, уларнинг ҳар томонлама ривожланишига ҳисса қўшаётганлиги ҳамда катта ёшдаги болаларни мустақил ҳаётга тайёрлаётганлигини аниқлашди. Болалар иштирок этадиган тўгараклар, ижодий студиялар ва спорт тўгараклари ҳамда муваффақият ва ютуқлари ҳақида суҳбатлашиб, режалар ва орзулари билан бўлишишди. Болалар билан ўтказилган суҳбатлардан гвардиячилар оиладаги ахлоқий ва психологик муҳит, катталар ва ўспиринлар ўртасида қанчалик ишончли муносабатлар ривожланганлиги тўғрисида хулоса чиқаришди.
Учрашув якунида масъуллар ота-оналарнинг саволларига жавоб беришди, инспектор-психологлар эса болаларни тарбиялаш ва уларни янги ўқув йили бошланишига тайёрлаш бўйича маслаҳат ва тавсиялар беришди.
