Мурғак қалб эгаларига меҳр кўрсатиш, уларга доимо эътибор қаратиш халқимизнинг азалий қадриятларидан бири. Бугун юртимиз бўйлаб Янги йил арафасида уларга қувонч улашиш мақсадида байрам тадбирлари ташкил этилмоқда. Ҳар йилги анъанага мувофиқ, бу йил ҳам меҳрибонлик уйлари тарбияланувчилари, мурувват уйининг ўғил-қизлари, ота-она қарамоғидан маҳрум бўлган болалар ҳамда хизмат вазифасини бажариш чоғида ҳалок бўлган ҳуқуқ-тартибот органлари ходимлари ва ҳарбий хизматчиларнинг фарзандлари учун Сирдарё вилоятига Президент совғалари етиб келди. Сирдарё вилояти бўйича Миллий гвардия бошқармаси ҳамда Қўриқлаш бошқармаси, Сирдарё вилояти ҳокимлиги, вилоят Халқ таълими бошқармаси томонидан вилоятда ташкил этилган 8та "Оилавий болалар уйи"да ота-она меҳри оғушида тарбияланаётган болажонларга совғалар топширилди. Шунингдек, Сардоба сув тошқинида қаҳрамонларча ҳалок бўлган Миллий гвардия ҳарбий хизматчиси Хусниддин Суяров ва хизмат вақтида ҳалок бўлган Миллий гвардия Сирдарё вилояти Қўриқлаш бошқармаси ходими Ғайрат Холиқуловларнинг оилаларидан хабар олинди ҳамда фарзандларига Президент совғалари топширилди. Янги йил байрамини ўзгача интиқлик билан кутаётган болажонларга бу совғалар ўзгача қувонч ҳадя этди.