“Меҳр дафтари” тизимининг ишлаш тартиби ва тамойилларини ўрганишга бағишланган семинар-тренинг ўтказилди
Вазирлар Маҳкамасининг 2022-йил 17-январдаги 26-сонли “Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш чора-тадбирлари тўғрисида” ги Қарори ҳамда Миллий гвардия қўмондонининг тегишли буйруғи ижросини таъминлаш мақсадида сектор мутахассислари учун Тошкент шаҳар ҳокимлиги ва пойтахт туманлари мутасаддилари томонидан болаларни ҳимоя қилиш масалалари бўйича ўқув семинари бўлиб ўтди.
Машғулотлар давомида Мактабгача ва мактаб таълими вазирлиги вакиллари, Жамоат хавфсизлиги университети “Ҳарбий ватанпарварлик маънавий-маърифий тарбия ва ёшлар билан ижтимоий ишлаш” кафедраси профессор-ўқитувчилари билан биргаликда, хусусан, кафедра профессори, педагогика фанлари доктори Ш. Акрамова семинар иштирокчиларига “Меҳр дафтари” электрон платформасини жорий этишнинг мақсад ва вазифалари ҳақида гапириб берди.
Етим ва ота-она қарамоғисиз қолган болаларни электрон маълумотлар базасига киритиш тартиби ва тамойилларига алоҳида эътибор қаратилди. “Меҳр дафтари” тизими болалар муаммоларини ўрганиш ва ҳал этиш, уларнинг орзу-интилишларини рўёбга чиқариш, шунингдек, уларни ўз тарбиясига олган оилаларни ижтимоийлаштириш ва рағбатлантиришга кўмаклашишга қаратилгани алоҳида таъкидланди.
Электрон платформа идоралараро ахборот алмашиш, шунингдек, “Меҳр дафтари” тизими томонидан амалга оширилаётган чора-тадбирлар самарадорлигини назорат қилиш имконини беради.
